میڈرڈ: نائجیریا سے نکلنے والے تین تارکین وطن نے جانیں شدید خطرے میں ڈال کر 11 دن تک ایک بحری جہاز کی پتوار (اسٹیئرنگ بلیڈ) پر سفر کیا اور اسپین پہنچے۔
غیر ملکی میڈیا کے مطابق ہسپانوی حکام کا کہنا ہے کہ نائجیریا سے گیارہ دن کا سفر مکمل کرنے کے بعد پہنچنے والے ایک بحری جہاز کی پتوار پر تین تارکین کو تشویش ناک حالت میں پایا گیا۔
کوسٹ گارڈ کی جانب سے شیئر کی گئی ایک تصویر میں آئل ٹینکر کے پتوار پر بیٹھے ہوئے افراد کو دیکھا جا سکتا ہے، ان کے پاؤں پانی سے ایک میٹر سے بھی کم دوری پر تھے۔
اہل کاروں نے تینوں تارکین وطن کو فوری طور پر اسپتال پہنچایا، تارکین وطن پانی کی کمی اور ہائپو تھرمیا کا شکار ہو گئے تھے، ایک کی حالت تشویش ناک ہے۔
یہ واضح نہیں ہو سکا ہے کہ آیا انھوں نے پورا سفر اسٹیئرنگ بلیڈ پر ہی گزارا، یا وہ اسپین کے قریب پہنچنے کے بعد اس پر کسی طرح آ گئے تھے۔
