بھارت میں ریلوے لائن پر چلنے والا گائیوں کا ریوڑ ٹرین نے کچل دیا، جس کے نتیجے میں 11 گائے ہلاک اور متعدد زخمی ہوگئیں۔
بھارتی ریاست اتر پردیش کے سنبھل ضلع میں کسانوں نے آوارہ مویشیوں سے پریشان ہوکر گائیوں کے ایک ریوڑ کو ریلوے ٹریک پر ہانک دیا۔
بھارتی میڈیا کی رپورٹ کے مطابق دو درجن آوارہ جانوروں کا ریوڑ ریلوے ٹریک پر دوڑ رہا تھا کہ اسی دوران وہاں تیز رفتار دہرادون ایکسپریس پہنچ گئی جس کی زد میں آ کر 11 گائے کچلی گئیں اور کئی شدید زخمی ہوگئیں۔
گائیوں کے ریوڑ سے ٹکرانے کے بعد ٹرین کو روک دیا گیا ور ایک گھنٹہ بعد اسے آگے کے لئے روانہ کیا جا سکا۔ مقامی لوگوں نے بتایا کہ یہاں کی گائیں علی گڑھ، مراد آباد ریلوے ٹریک کے قریب کھیتوں میں کھڑی فصلوں کو تباہ کر رہی ہیں۔ کسانوں نے غالباً ناراض ہو کر ان گائیوں کو ریلوے ٹریک کی طرف ہانک دیا ہوگا۔
ایک مقامی شخص نے میڈیا کو بتایا کہ گزشتہ دو ماہ میں اس علاقے میں اس طرح کے 12 سے زیادہ واقعات رونما ہوچکے ہیں۔
