نئی دہلی: بھارت میں ایک شیر خوار بچہ آوارہ کتوں کے ہتھے چڑھ گیا، کتوں نے بچے کو بری طرح بھنبھوڑ ڈالا جس کے بعد ننھا بچہ اسپتال میں زخموں کی تاب نہ لا کر چل بسا۔
بھارتی میڈیا کے مطابق یہ افسوس ناک واقعہ ریاست اتر پردیش کے شہر نوئیڈا میں ایک ہاؤسنگ سوسائٹی کے قریب پیش آیا، بچے کی موت کے بعد علاقہ مکینوں نے احتجاجاً سڑک بند کردی اور احتجاج شروع کردیا۔
مظاہرین کا کہنا ہے کہ علاقے میں اس سے قبل بھی سگ گزیدگی کے واقعات ہوچکے ہیں۔ اس موقع پر کسی ناخوشگوار صورتحال سے نمٹنے کے لیے پولیس کی بھاری نفری بھی وہاں پہنچ گئی۔
پولیس کے مطابق سوسائٹی میں تعمیراتی کام جاری تھا جہاں مزدور کام کر رہے تھے، انہی میں ایک خاتون سپنا دیوی اپنے 18 ماہ کے بیٹے کو لے کر وہاں مزدوری کرنے آرہی تھیں۔
واقعے کے روز سپنا بچے کو ایک جگہ بٹھا کر کچھ دور کام کر رہی تھی جب لوگوں نے بچے کے رونے اور چیخنے کی آوازیں سنیں، لوگ وہاں پہنچے تو کئی آوارہ کتے بچے کو گھیر کر اسے بھبنھوڑ رہے تھے۔
لوگوں نے کتوں کو مار کر وہاں سے بھگایا اور بچے کو فوری طور پر اسپتال منتقل کیا گیا، تاہم بچہ دوران علاج اسپتال میں دم توڑ گیا۔
سوسائٹی کے اپارٹمنٹ اونرز ایسوسی ایشن کے نائب صدر دھرم ویر یادو کا کہنا ہے کہ بچے کو ایک نجی اسپتال لے جایا گیا اور رات دیر گئے تک بچے کا آپریشن جاری رہا، کتوں نے بچے کے پیٹ میں کئی جگہ کاٹ لیا تھا۔
انہوں نے کہا کہ ڈاکٹرز کے مطابق بچے کی آنت باہر آگئی تھی، انہوں نے اس کی جان بچانے کی کوشش کی لیکن ننھا بچہ زخموں کی تاب نہ لا کر چل بسا۔
واقعے کے بعد پوری سوسائٹی صدمے اور اشتعال کی کیفیت میں ہے اور لوگ مقامی انتظامیہ کے خلاف احتجاج کر رہے ہیں۔
