اسٹار کاسٹ نہ ہونے کے باوجود ’استری 2‘ کس طرح اتنی کامیاب ہوئی، معروف فلمساز کرن جوہر نے اس حوالے سے انکشاف کیا ہے۔
کرن جوہر کا استری 2 کی کامیابی کے بعد کہنا تھا کہ یہ ہندی اور بھارتی مین اسٹریم سینما دونوں کے لیے جشن منانے کی بات ہے کیوں کہ کچھ سالوں سے باکس آفس پر ہمیں اپنی فلموں اور کانٹینٹ کو لے کر چیلنجز کا سامنا تھا۔
نامور باولی ووڈ ڈائریکٹر نے کہا کہ استری 2 کی میگاہٹ کامیابی سے پتا چلتا ہے کہ ایک ٹھوس اسٹوری ٹیلنگ اور بہترین مواد فلم کے لیے کتنی اہمیت رکھتے ہیں۔
فلم ساز نے مزید کہا کہ اس کے علاوہ فلم میں بہادری اور تصور، ٹھوس کہانی پر توجہ اور سامعین کے ساتھ گہرا رشتہ آپ کے لیے بھرپور منافع لاتا ہے اور فلم کھڑکی توڑ بزنس کرتی ہے!۔
خیال رہے کہ بالی وڈ اداکار راج کمار راؤ اور اداکارہ شردھا کپور کی نئی ہارر کامیڈی فلم ’استری 2‘ نے باکس آفس پر نیا ریکارڈ اپنے نام کرلیا ہے۔
ہارر کامیڈی فلم استری 2 کی ہدایت کاری امر کوشک نے انجام دی ہے جبکہ اس فلم نے باکس آفس پر اپنے ابتدائی دن ہی کئی ریکارڈ توڑ دیے ہیں۔
فلم استری 2 نے پہلے دن 46 کروڑ روپے کی اوپننگ کے ساتھ اس سال کی سب سے زیادہ کمانے والی فلم کا اعزاز اپنے نام کیا تھا، فلم 15 اگست کو عالمی سطح پر ریلیز کی گئی، 2018 کی فلم استری کے سیکویل نے دنیا بھر سے اب تک 300 کروڑ روپے سے زائد کی کمائی کرلی ہے۔
اس فلم کے سیکوئیل میں اداکارہ شردھا کپور، اداکار راجکمار راؤ، اپارشکتی کھرانا، پنکج ترپاٹھی اور ابھیشیک بنرجی نے اداکارہ کے جوہر دکھائے ہیں۔
