کراچی: ہول سیل مارکیٹوں میں پیر کو ہونے والی مجوزہ ہڑتال پر کمشنر کراچی نے تاجروں کو مذاکرات کیلئے بلالیا۔
اس حوالے سے چیئرمین ہول سیل گروسرز ایسوسی ایشن عبدالرؤف ابراہیم نے پریس کانفرنس کرتے ہوئے بتایا کہ مذکرات میں کمشنر کراچی نے ہمیں ذخیرہ اندوزوں اور سٹہ مافیا کے خلاف سخت کارروائیوں کا یقین دلایا ہے۔
عبدالرؤف ابراہیم نے کہا کہ اس یقین دہانی کے بعد ہم نے پیر کو ہڑتال نہ کرنے کا فیصلہ کیا ہے، معمول کا کاروبار کرنے والے تاجر مکمل اطمینان اور سکون سے اپنا کام کریں۔
ہول سیل گروسرز ایسوسی ایشن کے چئیرمین عبدالرؤف ابراہیم نے جوڑیا بازار میں پریس کانفرنس کرتے ہوئے کہا کہ125تھوک دکانوں، گوداموں کو سیل کرکے بھاری جرمانے عائد کیے گئے ہیں۔ چالان کرنے کا مکمل ضابطہ ہونا چاہیے۔ ہول سیل بازار کے ایک تاجر پر 2 بوری چینی پر 30 ہزار روپے جرمانہ عائد کیا گیا ہے۔
چیئرمین ہول سیل گروسرز ایسوسی ایشن کا کہنا تھا کہ تمام تاجر ذخیرہ اندوزی اور سٹے کے خلاف انتظامیہ سے بھرپور تعاون کرینگے۔
انہوں نے کہا کہ اجناس کے تاجر روزانہ چینی اور آٹے کی قیمتیں دکانوں پر آویزاں کریں گے، کمشنر کراچی سے اپیل کی ہے کہ چینی اور آٹے کے ایکس مل نرخ مقرر کرائیں۔
عبدالروف ابراہیم نے کہا کہ انتظامیہ سے مل کر ذخیرہ اندوزوں، سٹہ مافیا کے خلاف کام کیلئے تیار ہیں، چالان کرنے کا ضابطہ ہونا چاہئیں۔
