The news is by your side.

Advertisement

شاہ سلمان کی کامیاب کولونو اسکوپی

ریاض: جدہ کے شاہ فیصل اسپیشلسٹ اسپتال میں سعودی عرب کے فرماں روا خادم حرمین شریفین شاہ سلمان بن عبدالعزیز کی کام یاب کولونو اسکوپی کی گئی۔

سعودی پریس ایجنسی کے مطابق خلیجی قیادت نے شاہ سلمان کی کامیاب کولونو اسکوپی پر ان کے نام بھیجے گئے پیغامات میں ان کی جلد صحت یابی کی دعا کی ہے۔

خلیجی ممالک کی قیادت نے کامیاب کولونو اسکوپی پر خادم حرمین شریفین شاہ سلمان بن عبد العزیز کو مبارک باد بھی پیش کی ہے، امیر قطر شیخ تمیم بن حمد آل ثانی نے شاہ سلمان کو مکتوب روانہ کر کے کولونو اسکوپی پر مبارک باد پیش کی۔

امیر قطر نے اپنے مکتوب میں شاہ سلمان کی جلد صحت یابی اور خیر و عافیت کی امید بھی ظاہر کی، نائب امیر قطر شیخ عبد اللہ بن حمد آل ثانی اور وزیر اعظم و وزیر داخلہ شیخ خالد بن خلیفہ آل ثانی نے بھی مبارک باد اور نیک خواہشات پر مبنی مکتوب بھیجا ہے۔

سعودی فرمانروا شاہ سلمان طبی معائنے کے لئے اسپتال داخل

متحدہ عرب امارات کے صدر شیخ خلیفہ بن زاید آل نہیان نے بھی شاہ سلمان کو مکتوب روانہ کرتے ہوئے شاہ سلمان کی خیریت دریافت کی ہے۔

امارات کے صدر نے اپنے مکتوب میں شاہ سلمان کو مبارک باد پیش کرتے ہوئے صحت و عافیت کی امید ظاہر کی، یو اے ای کے نائب صدر اور دبئی کے حکمران شیخ محمد بن راشد آل مکتوم اور ولئ عہد ابوظبی شیخ محمد بن زاید کی طرف سے بھی مکتوبات موصول ہوئے ہیں، جس میں انھوں نے شاہ سلمان کی خیرت دریافت کی۔

بحرین کے ولئ عہد شیخ سلمان بن حمد آل خلیفہ، شارجہ کے حکمران شیخ ڈاکٹر سلطان القاسمی، ام القوین کے حکمران شیخ سعود بن راشد المعلا، راس الخیمہ کے حکمران شیخ سعود بن صقر القاسمی، الفجیرہ کے حکمران شیخ حمد بن محمد الشرقی اور عجمان کے حکمران شیخ حمید بن راشد النعیمی نے بھی شاہ سلمان کو مبارک باد کے پیغامات روانہ کیے ہیں۔

بحرین کے فرماں روا شاہ حمد بن عیسیٰ آل خلیفہ نے شاہ سلمان کے نام مکتوب روانہ کرتے ہوئے کامیاب کولونو اسکوپی پر مبارک باد پیش کی ہے، انھوں نے شاہ سلمان کے لیے لمبی عمر اور صحت اور عافیت کی دعا بھی کی۔

واضح رہے کہ اتوار کو سرکاری نیوز ایجنسی نے رپورٹ کیا تھا کہ سعودی عرب کے شاہ سلمان بن عبدالعزیز کا جدہ کے کنگ فیصل اسپیشلسٹ اسپتال میں کولونو اسکوپی کا عمل ہوا اور اس کے نتائج اچھے رہے، پروسیجر کے بعد ڈاکٹروں نے فیصلہ کیا کہ شاہ سلمان کو آرام کے لیے کچھ وقت اسپتال میں رہنا چاہیے۔

کولونو اسکوپی بڑی آنت (کولون) اور مقعد میں مسائل کی تحقیقات کے لیے کیا جانے والا ایک ٹیسٹ ہے اور اسے بڑی آنت کے کینسر کی اسکریننگ کے لیے استعمال کیا جا سکتا ہے۔

Comments

یہ بھی پڑھیں