The news is by your side.

Advertisement

حادثے کی شکار مرغی کی ٹوٹی ٹانگوں کا کامیاب آپریشن

قاہرہ: مصر کے ایک علاقے میں حادثے کی شکار مرغی کی ٹوٹی ٹانگوں کے لیے ایک پیچیدہ آپریشن کیا گیا ہے۔

تفصیلات کے مطابق مصر کے ایک شہر مرسی علم میں گھر کی چھت سے گر کر ایک مرغی کی دونوں ٹانگیں ٹوٹ گئی تھیں، جس پر مرغی کا آپریشن کیا گیا، اور اس کی ٹوٹی ہڈیاں جوڑ دی گئیں۔

یہ اپنی نوعیت کا ایک عجیب و غریب آپریشن تھا، مرغی کی ٹوٹی ہڈیاں جوڑنے کے لیے کیے جانے والے آپریشن پر 7 ہزار مصری پونڈ لاگت آئی۔ مصری اخبار الوطن کے مطابق مرغی ٹانگوں کی ہڈیاں ٹوٹ جانے کے باعث بہت زیادہ مشکل میں تھی اور چلنے پھرنے کے قابل نہیں رہی تھی۔

جانوروں کے مصری ڈاکٹر محمد احمد نے بتایا کہ آپریشن سے قبل مرغی کا مکمل معائنہ کیا گیا تھا، اور اسے بے ہوش کر کے آپریشن کیا گیا، یہ آپریشن ایک گھنٹہ 45 منٹ تک جاری رہا اور اس میں دو ڈاکٹروں اور ایک معاون نے حصہ لیا۔

مرغی کے مالک کے بارے میں معلوم ہوا کہ وہ سوئٹزرلینڈ کا باشندہ ہے اور مصر میں مقیم ہے، انھوں نے ڈاکٹروں کو بتایا کہ لیسکی نسل کی ان کی پالتو مرغی گھر کی دوسری منزل سے گری تھی، مرغی صحت مند اور بھاری بھرکم تھی، جس کی وجہ سے اس کی ٹانگوں کی ہڈیاں ٹوٹ گئیں۔

دل چسپ بات یہ ہے کہ سوشل میڈیا پر جب مرغی کے آپریشن کی خبر دی گئی تو یہ اطلاع بڑی تیزی سے وائرل ہو گئی، صارفین کا ردِ عمل دل چسپ تبصروں کی صورت میں سامنے آیا۔

ایک صارف نے لکھا ’متاثرہ مرغی کے لیے مشورہ ہے کہ وہ آپریشن کے بعد انڈے استعمال کرے جو کیلشیم سے بھر پور ہوتے ہیں‘۔ ایک صارف نے مرغی کے علاج پر اتنی رقم خرچ کرنے پر سوئس شہری کو تنقید کا نشانہ بھی بنایا۔

Comments

یہ بھی پڑھیں