مہنگائی سے پریشان عوام کیلئے ایک اور بری خبر آگئی ، لاہور میں چینی کی قیمت میں ایک ہفتے کے دوران تیسری بار اضافہ ہوا ہے۔
تفصیلات کے مطابق آٹے کے بعد اوپن مارکیٹ میں چینی بھی مہنگی ہوگئی، ایک ہفتے کے دوران چینی کی قیمت میں تیسری بار اضافہ ہوا، مارکیٹ میں 100روپے کے بعد 130روپے فی کلو میں فروخت ہونے لگی۔
ذرائع کے مطابق ہول سیل مارکیٹ میں 50 کلو چینی کا تھیلا 5700 سے بڑھ کر 6150 روپے کا ہوگیا, دکانداروں کا کہنا ہے کہ مافیاز کی وجہ سے چینی مہنگی ہورہی ہے۔
مارکیٹ ذرائع کا کہنا ہے کہ صرف 5 روز میں چینی کی قیمت 100 سے بڑھ کر 130 روپے ہوگئی، چینی کی ذخیرہ اندوزی اور افغانستان اسمگلنگ جاری ہے۔
ہول سیل ڈیلر نعمان احمد کا کہنا ہے کہ حکومت نے فوری طور پر ایکشن نہ لیا تو چینی کی قیمت مزید بڑھے گی، گوداموں میں چینی وافر مقدار میں موجود ہے جان بوجھ کرقیمت بڑھائی جارہی ہے۔
انہوں نے کہا کہ شوگر ملز مالکان اور ڈیلرز قیمت کارٹیل سے بڑھا رہے ہیں، افغانستان میں چینی فی کلو 190 روپے فروخت ہو رہی ہے۔
دوسری جانب شہریوں کا کہنا ہے کہ ماہ صیام میں چینی کا استعمال بڑھ جاتا ہے، حکومت نے وہ بھی مہنگی کردی ہے، مہنگائی کی ستائی عوام نے حکومت سے مطالبہ کیا ہے کہ وہ مافیاز کے خلاف سخت کارروائی کرے تاکہ بڑھتی مہنگائی کو کنڑول کیا جا سکے۔
