کویت سٹی: کویتی شہری نے حکومت کو گرمی ختم کرنے کے لیے عجیب و غریب تجویز دے دی، شہری نے حکومت سے کہا ہے کہ گرمی سے بچاؤ کے لیے طیاروں سے برف گرائی جائے۔
تفصیلات کے مطابق گرمی کا زور توڑنے کے لیے ایک کویتی شہری کی تجویز نے لوگوں کو حیران کر دیا ہے، ایک ٹی وی چینل کو انٹرویو میں انھوں نے جو تجویز دی، اس کی وجہ سے ان کا یہ انٹرویو سوشل میڈیا پر بہت مقبول ہو رہا ہے۔
کویتی شہری نے ان دنوں اپنے یہاں ہلاکت خیز گرمی سے نجات حاصل کرنے کے لیے یہ عجیب و غریب حل تجویز کیا کہ طیاروں سے ملک کی فضاؤں پر برف باری کی جائے۔
انھوں نے کہا گرمی سخت پڑ رہی ہے، میری آرزو ہے کہ وزارت دفاع جن طیاروں سے فوجیوں کو لانے، لے جانے اور ٹینک ایک جگہ سے دوسری جگہ منتقل کرنے کا کام انجام دیتی ہے، ان پر برف کی سلیں لادے اور شدید گرمی والے علاقوں پر برف کی بارش کر دے۔
شہری کا مؤقف تھا کہ اگر ایسا ہو جائے تو ہمارے یہاں گرمی کا موسم برسات کے موسم میں تبدیل ہو جائے گا۔
شہری کا یہ بھی کہنا تھا کہ فضا سے برف گرائے جانے کا یہ فائدہ بھی ہوگا کہ برف کے کارخانے دن رات کام کریں گے، دوسری طرف سخت گرمی ختم ہوگی اور آب و ہوا خوش گوار ہو جائے گی۔
