کراچی : شہر قائد میں گرمی کے موسم کے باوجود گیس کا بحران شدت اختیار کرگیا جس کے باعث بعض علاقوں میں گیس مکمل طور پر غائب ہوگئی۔
تفصیلات کے مطابق ملک میں نئی حکومت کے آتے ہی موسم گرما میں بھی کراچی میں گیس بحران شدت اختیار کرگیا ہے، آئے روز ہوٹلوں سے منگوانے والے شہری اذیت میں مبتلا ہوگئے۔
شہر کے صنعتی اور رہائشی علاقوں میں گیس کی دس گھنٹے سے زائد لوڈ شیڈنگ اور لوپریشر سے صنعتی اور گھریلو سرگرمیاں متاثر ہورہی ہیں، موجودہ حکومت نے گیس فراہمی کا بندوبست نہیں کیا تو صنعتوں کو گیس کی فراہمی بند ہونے سے برآمدات میں کمی کا خدشہ ہے۔
اس حوالے سے نارتھ کراچی صنعتی ایسوسی ایشن کے چئیرمین فیصل معیز کا کہنا ہے کہ ایم ڈی سوئی سدرن گیس عمران منیار نے گیس فراہم کرنے سے مکمل انکار کرتے ہوئے کہا ہے کہ میں بالکل بے بس ہوں۔
کراچی کے صنعت کاروں نے وزیراعظم شہباز شریف، وزیرمملکت پیٹرولیم ڈویژن مصدق ملک سے گیس کی لوڈ شیڈنگ کا نوٹس لینے کی اپیل کرتے ہوئے کہا ہے کہ گیس پریشر مسلسل صفر رہنے کی وجہ سے پیداواری سرگرمیاں بندش کا شکار ہیں۔
صنعت کاروں کا مزید کہنا ہے کہ صنعتوں کو گیس نہ ملنے کی وجہ سے متعدد یونٹس بند پڑے ہیں، گیس کی عدم فراہمی کی وجہ سے برآمدی آرڈرز منسوخ ہوئے تو ذمہ دارایس ایس جی سی ہوگی۔
