نئی دہلی: تہاڑ جیل میں دو سو کروڑ روپے کے منی لانڈرنگ کیس میں قید بھارتی بزنس مین سکیش چندر شیکھر نے جیل سے جیکلین فرنینڈس کے نام ایک اور خط لکھ دیا ہے۔
بھارتی میڈیا رپورٹس کے مطابق سکیش چندر شیکھر نے جیل سے ایک بار پھر اداکارہ جیکلین کو محبت بھرا خط لکھا ہے، یہ خط انھوں نے اپنی سال گرہ کے موقع پر بھیجا۔
جب سے 200 کروڑ روپے کے منی لانڈرنگ کیس میں سکیش چندر شیکھر کا نام سامنے آیا ہے تب سے وہ میڈیا کی سرخیوں میں ہیں، اس کیس میں بالی ووڈ کی دو اداکارائیں جیکلین فرنینڈیس اور نورا فتیحی کے نام بھی سامنے آ چکے ہیں۔
سکیش مسلسل جیکلین کے نام محبت بھرے خطوط لکھ رہا ہے، ٹائمز آف انڈیا کے مطابق سکیش نے اپنی سالگرہ کے موقع پر خط میں لکھا کہ وہ جیکلین کو بہت یاد کر رہا ہے۔
سکیش نے لکھا ’میری ہما، میں اپنی سالگرہ کے دن آپ کو بہت یاد کر رہا ہوں، مجھے اپنے ارد گرد آپ کی کمی محسوس ہوتی ہے، میرے پاس الفاظ نہیں ہیں لیکن میں جانتا ہوں کہ میرے لیے آپ کی محبت کبھی ختم ہونے والی چیز نہیں ہے۔‘
سکیش نے خط میں مزید لکھا ’میں جانتا ہوں کہ آپ کے خوب صورت دل میں کیا ہے، مجھے ثبوت کی ضرورت نہیں ہے اور یہ سب میرے لیے اہم ہے۔‘
ہولی تہوار کے موقع پر بھی سکیش نے خط لکھ کر کہا تھا ’میں دنیا کی بہترین، حیرت انگیز انسان، خوب صورت جیکلین کو ہولی کی بہت بہت مبارک باد دیتا ہوں، وعدہ ہے کہ جو رنگ ختم ہو گئے ہیں، وہ سو گنا بڑھ کر آپ کے پاس واپس آ جائیں گے۔‘
