سکھر : کندھکوٹ سے اغواء ہونے والے نوجوان کی بازیابی کیلئے ورثاء کا قومی شاہراہ پر 8 گھنٹوں سے احتجاجی دھرنا جاری ہے۔
کئی گھنٹوں سے جاری قومی شاہراہ پر احتجاجی دھرنے کے باعث گاڑیوں کی لمبی قطاریں لگ گئیں، مظاہرین کو منتشر کرنےکیلیے آنے والے پولیس اہلکار اور مظاہرین کے درمیان ہاتھا پائی اور دھکم پیل ہوئی۔
اے آر وائی نیوز سکھر کے نمائندے سلیم سہتو کی رپورٹ کے مطابق ڈنڈا بردار مظاہرین نے پولیس اہلکاروں کو پیچھے دھکیل دیا، مظاہرین نےہاتھوں میں پتھر اور ڈنڈے اٹھا رکھے ہیں، احتجاج میں خواتین اور بچوں کی بڑی تعداد بھی شریک ہے۔
یاد رہے کہ چند روز قبل ڈاکوؤں نے ڈیرہ اسماعیل خان کے رہائشی نوجوان خالد پٹھان کو اغواء کرلیا تھا،ڈاکوؤں نے تاوان کیلئے نوجوان کو رسیوں سے باندھ کر تشدد کی وڈیو جاری کی تھی اور اہل خانہ سے نوجوان کی بازیابی کیلئے ایک کروڑ روپے تاوان کی رقم طلب کی ہے۔
