لاہور : وزیراعظم شہباز شریف کے صاحبزادے سلیمان شہباز کا کہنا ہے کہ 5 سال کوئی کام نہیں کیا صرف جھوٹے کیسز بنائے،یہ حقیقت ہے اگر انہوں نے عوام کی خدمت کی ہوتی تو آج یہ نہ ہوتا۔
تفصیلات کے مطابق وزیراعظم شہباز شریف کے صاحبزادے سلیمان شہباز نے منی لانڈرنگ کیس سے بری ہونے کے بعد میڈیا سے گفتگو کرتے ہوئے کہا کہ یہ کیس 2018 سےشروع ہوا اس دوران ڈیلی میل کا کیس بھی آیا، یہ جھوٹ کا پلندہ 5سال میں تیار کیا گیا، پانچ سال کوئی کام نہیں کیا گیا صرف جھوٹے کیسز بنائے گئے۔
سلیمان شہباز کا کہنا تھا کہ ڈیل میل نے معافی مانگی اور اس کیس سے بھی بری ہوئے ، یہ حقیقت ہے اگر انہوں نے عوام کی خدمت کی ہوتی تو آج یہ نہ ہوتا۔
انھوں نے کہا کہ یہ سیاسی کیس بنائے گئے جو عدالتوں کے فیصلوں سے ثابت ہوئے، پہلے شہباز شریف اور حمزہ صاحب بری ہوئے ،آج عدالت سے ہم سرخرو ہوئے۔
یاد رہے عدالت نے منی لانڈرنگ کیس میں وزیراعظم کے بیٹے سلیمان شہباز سمیت دیگر ملزمان کو بری کردیا ہے، اس سے قبل عدالت اس کیس میں وزیراعظم شہباز شریف اور حمزہ شہباز کو بھی بری کرچکی ہے۔