ایبوہ : سلطان اذلان شاہ ہاکی کپ میں پاکستان نے ایشین چیمپئن جاپان کو3 کے مقابلے میں 5گول سے شکست دے کر برانز میڈل جیت لیا۔
قومی ہاکی ٹیم کو یہ موقع11سال بعد حاصل ہوا ہے کہ اس نے وکٹری اسٹینڈ پر جگہ بنائی، ملائشیا کے شہر ایبوہ میں کھیلے جانے والے سلطان ازلان شاہ ہاکی کپ میں پاکستان اور جاپان کی ٹیمیں مدمقابل تھیں۔
تیسری اور چوتھی پوزیشن کیلئے کھیلے جانے والے میچ میں پاکستان نے جاپان کو سنسنی خیز مقابلے کے بعد تین کے مقابلے میں پانچ گول سے ہرا دیا۔
پاکستان کی جانب سے 11ویں منٹ میں حنان شاہد نے فیلڈ گول، 18ویں منٹ میں افراز احمد نے پینلٹی کارنرکے ذریعے،27 ویں اور 31 ویں منٹ میں رومان نے 2 فیلڈگول کیے جب کہ 53 ویں منٹ میں رانا عبدالوحید نے فیلڈ گول اسکور کیا۔
جاپان کی جانب سے 10ویں منٹ میں کینٹارو نے جب کہ 31ویں اور 50 ویں منٹ میں یوما نے 2گول اسکور کیے۔ ایونٹ میں 11 سال بعد پاکستان تیسری پوزیشن حاصل کرکے برونز میڈل جیتنے میں کامیاب ہوگیا۔
اس سے قبل پاکستان نے سال دو ہزار گیارہ میں آسٹریلیا سے شکست کھا کر سلور میڈل جیتا تھا، پاکستان ہاکی ٹیم میں نو نئے کھلاڑیوں نے اس ایونٹ سے اپنے انٹرنیشنل کیریئر کا آغاز کیا اور ایونٹ میں شاندار کارکردگی دکھائی۔
مذکورہ ایونٹ میں چھ ٹیموں نے شرکت کی جن میں میزبان ٹیم ملائشیا، پاکستان، جاپان ، کوریا، ساوتھ افریقہ اور مصر شامل ہیں۔
