اسلام آباد : عید الاضحیٰ کے موقع پر حکومت کی جانب سے سرکاری سطح پر عام تعطیلات کی سمری وزارت داخلہ کو بھجوا دی گئی ہے۔
تفصیلات کے مطابق چند روز بعد آنے والی عید قرباں پر حکومت کی جانب سے عوام کو چھٹیاں دینے کی سمری وزارت داخلہ کو بھجوادی گئی ہے، جس میں عوام کے لیے 4 سرکاری تعطیلات کی سفارش کی گئی ہے۔
ذرائع کا کہنا ہے کہ وزارت داخلہ کو ارسال کی جانے والی سمری میں حکومت کی جانب سے 21 اگست سے 24 تک عام تعطیل دینے کی سفارش کی گئی ہے۔
خیال رہے کہ عید الاضحیٰ رواں ماہ کی 22 تاریخ بروز بدھ کو ہونے کا امکان ہے، جس کے لیے سرکاری تعطیلات کا اعلان وزیر اعظم کی منظوری کے بعد کیا جائے گا۔
ذرائع کا کہنا ہے کہ اگر وزارت داخلہ نے مذکورہ سمری کے مطابق تعطیلات کا اعلان کردیا تو 25 اگست کو ہفتہ پڑے گا اور نجی بینک سمیت تمام سرکاری اداروں میں ہفتہ و اتوار تعطیل ہوتی ہے، جس کے باعث سرکاری محکموں کے ملازمین کو 6 دن کی چھٹیاں ملیں گی۔
وفاقی حکومت نے سرکاری ملازمین کی سہولت کے لیے عید الاضحی سے پہلے تنخواہ اور ریٹائرڈ ملازمین کو 17رواں ماہ کی تاریخ تک پینشن ادا کرنے کا اعلان کیا تھا۔ اس سلسلے میں وفاقی حکومت کی جانب سے اکاؤنٹنٹ جنرلز کو سرکلر جاری کر دیا گیا۔
وزارت خزانہ کے مطابق وفاقی حکومتی وسول آرمڈ فورسز کو پنشن اور تنخواہ ایڈوانس دی جائے گی، فیصلہ ملازمین کو قربانی کرنے اور عید کی خوشیاں منانے کی سہولت کے پیش نظر کیا گیا۔
