کراچی: سیکرٹری تعلیم سندھ افضل پیچو ہو کی جانب سے جاری کردہ نوٹیفیکشن کے مطابق صوبہ سندھ میں موسم گرما کی تعطیلات 19 مئی سے 24 جولائی تک ہونگی،نوٹیفیکیشن آج ہی سے نافذ ہوگا۔
تفصیلات کے مطابق آج علی الصبح محکمہ تعلیم کی جانب سے نوٹیفیکیشن جاری کیا گیا ہے جس میں صوبہ بھر موسم گرما کی تعطیلات آج یعنی 19 مئی سے 24 جولائی تک کرنے کا اعلان کیا گیا۔
یاد رہے اس سے قبل موسم سرما کی تعطیلات یکم جون سے 31 جولائی تک کی جاتی تھی،حالیہ فیصلہ کراچی اور اندرونِ سندھ میں جاری گرمی کی شدت اور درجہ حرارت میں مسلسل اضافہ کے پیشِ نظرکیا گیا۔
یاد رہے کل اندرون سندھ کئی شہروں میں سورج آگ برساتا رہا ہے جس سے نواب شاہ،حیدرآباد،ٹندوجام سمیت کئی شہروں میں درجہ حرارت 50 ڈگری سینٹی گریڈ تک پہنچ گیاتھا۔
دوسری طرف آج صبح اسکول پہنچنے والے بچوں کو موسم ِ گرما کی تعطیلات کا پتہ چلا تو انہوں نے خوشی خوشی گھر کی راہ لی،لتاہم بغیر کسی پیشگی اطلاع کے تعطیلات کا اعلان ہونے پر اساتذہ سالانہ پروگرام برائے تکمیلِ سلیبس کو مکمل کرنے میں پیش آنے والے ممکنہ مشکلات سے پریشان نظر آتے ہیں۔
صوبہ سندھ کے سیکرٹری تعلیم افضل پیچوہو کے مطابق موسم ِ گرما کی تعطیلات کا اعلان وزیرِ تعلیم کی منظوری کے بعد کیا گیا،گرمی کی شدت میں دن بہ دن اضافہ کے پیش نظر فیصلہ عجلت میں کیا گیا تاکہ ہیٹ اسٹروک کے نقصانات سے طلبہ و طالبات کو محفوظ رکھا جا سکے۔