The news is by your side.

Advertisement

امریکا میں جامنی رنگ کا سپر ٹماٹر تیار

امریکا میں جینیاتی ماہرین نے جامنی رنگ کے ٹماٹر کی ایک قسم تیار کر لی ہے، جسے اس کی غذائی خصوصیات کے باعث سپر ٹماٹر کہا جا رہا ہے۔

امکان ظاہر کیا جا رہا ہے کہ امریکا میں جامنی رنگ کا ‘سپر فوڈ’ ٹماٹر جلد فروخت اور کاشت کے لیے مارکیٹ میں آ سکتا ہے، ایک چھوٹی کمپنی نے امریکا میں جینیاتی طور پر تبدیل شدہ اس ٹماٹر کی فروخت کی منظوری کے لیے درخواست دے دی ہے۔

یہ ٹماٹر بلیو بیری میں پائے جانے والے فائدہ مند روغن سے بھرپور ہے، اس میں صحت کے لیے انتہائی مفید بلیو بیری کی رنگت اور کچھ اجزا جینیاتی طور پر شامل کیے گئے ہیں، یہ عام ٹماٹر کے مقابلے میں توڑے جانے کے بعد دگنے وقت تک تازہ رہتا ہے۔

اسے نارفوک پلانٹ سائنسس نامی کمپنی نے تیار کیا ہے جسے ہر طرح کی آزمائش سے گزارا گیا، گزشتہ برس امریکی مجاز اداروں بالخصوص ایف ڈی اے میں اس کی درخواست دی گئی تھی جو اندرونی حلقوں کے مطابق منظوری کے مراحل میں ہے۔

مذکورہ کمپنی نہ صرف تازہ ٹماٹر فروخت کرے گی بلکہ کسانوں کو جینیاتی تبدیل شدہ ٹماٹر کے بیج بھی فراہم کیے جائیں گے جس سے زائد آمدنی متوقع ہے۔

یاد رہے کہ جامنی ٹماٹر سب سے پہلے 2008 میں برطانوی سائنس داں کیتھی مارٹن نے بنائے تھے، انھوں نے ایک اہم انکشاف کیا تھا کہ جن چوہوں کو اس خاص ٹماٹر کا پاؤڈر دے کر رکھا گیا تھا، دیگر چوہوں کے مقابلے میں ان کی زندگی کا دورانیہ 30 فی صد تک بڑھا ہوا دیکھا گیا، اگرچہ اس کا مکمل اطلاق انسانوں پر نہیں ہو سکتا لیکن انسانوں پر اس کا کچھ اثر ضرور ہو سکتا ہے۔

جامنی ٹماٹر میں اینتھوسائنائنس کی 10 گنا زائد مقدار موجود ہے جو ایک طاقت ور اینٹی آکسیڈنٹ ہے اور جسم کی خلوی سطح پر حفاظت کرتا ہے، یہ فری ریڈیکلز بننے سے روکتا ہے جو اندرونی سوزش سے لے کر سرطان تک کی وجہ بنتا ہے۔

Comments

یہ بھی پڑھیں