کراچی: سپریم کورٹ نے آصف زرداری کی نااہلی کے لئے دائر درخواست اعتراضات لگا کر واپس کردی.
تفصیلات کے مطابق آصف زرداری کی نااہلی کے لئے پی ٹی آئی نے سپریم کورٹ میں درخواست دائرکی تھی، جس پر سپریم کورٹ کی جانب سے اعتراض لگادیا.
رجسٹرار سپریم کورٹ نے موقف اختیار کیا ہے کہ درخواست گزاروں نے متعلقہ فورم سے رجوع نہیں کیا، فورم کی دستیابی کے باوجود درخواست گزاروں نےعدالت سے رجوع کیا.
یاد رہے کہ پی ٹی آئی کے رہنما خرم شیرزمان اور عثمان ڈارنے درخواستیں سپریم کورٹ میں دائرکی تھیں.
خیال رہے کہ 10 جنوری 2019 کو خرم شیر زمان نے اپنے بیان میں کہا تھا کہ آصف زرداری کے خلاف سپریم کورٹ میں پٹیشن دائرکریں گے، سندھ کے لوگ تیارہوجائیں آصف زرداری کی وکٹ اڑنے والی ہے، ایسے شواہد مل گئے ہیں جوصرف اعلیٰ فورم پرپیش کریں گے۔
یہ بھی پڑھیں: خرم شیرزمان نے آصف زرداری کے خلاف درخواست واپس لے لی
یہ بھی پڑھیں: ایم پی اے خرم شیرزمان کے اہلخانہ اسٹریٹ کرائم کا شکار بن گئے
قبل ازیں انھوں نے آصف علی زرداری کے نیویارک میں مبینہ اثاثوں کو الیکشن کمیشن کے سامنے ظاہر نہ کرنے کی بنیاد پر الیکشن کمیشن میں ایک ریفرنس بھی دائر کیا تھا.
واضح رہے کہ آصف علی زرداری 25 جولائی 2018 کو ہونے والے عام انتخابات میں این اے 213 نواب شاہ سے ممبر قومی اسمبلی منتخب ہوئے تھے۔
