اسلام آباد : سپریم کورٹ پریکٹس اینڈ پروسیجر ایکٹ کے خلاف درخواستوں پر سماعت جسٹس شاہد وحید کی خرابی صحت کے سبب غیرمعینہ مدت کے لئے ملتوی کر دی گئی۔
تفصیلات کے مطابق سپریم کورٹ پریکٹس اینڈ پروسیجر ایکٹ کیس کی سماعت غیر معینہ تک ملتوی کردی گئی ، کورٹ ایسوسی ایٹ نے سماعت ملتوی ہونےکی وجوہات بتا دیں۔
عدالتی عملے نے بتایا کہ سماعت جسٹس شاہد وحید کی خرابی صحت کے سبب ملتوی کی گئی، اٹارنی جنرل نے سماعت بجٹ سیشن کے بعد رکھنے کی استدعا کی تھی۔
عدالتی عملے نے کمرہ عدالت میں آ کر کہا کہ چیف جسٹس عمر عطا بندیال نے میٹنگ روم میں اٹارنی جنرل سمیت وکلاء کو بلایا، اٹارنی جنرل نے بتایا دو قوانین میں ہم آہنگی پیدا کرنے کیلئے فوری قانون سازی نہیں ہو سکی، اٹارنی جنرل کا موقف تھا بجٹ سیشن چل رہا ہے، فوری قانون سازی نہیں ہوسکتی۔
اٹارنی جنرل کا کہنا تھا لپ کہ کیس کی سماعت بجٹ سیشن کے بعد کی جائے۔
ذرائع نے کہا کہ جسٹس شاہد وحید کی عدم دستیابی کے باعث آج بینچ نامکمل تھا، چیف جسٹس عمر عطاء بندیال کی سربراہی میں 8 رکنی لارجر بینچ نے کیس کی سماعت کرنی تھی۔
