اسلام آباد: ملکی تاریخ میں پہلی بار ای کورٹس کا آغاز ہوگیا، چیف جسٹس آصف سعید کھوسہ کی سربراہی میں ای کورٹ نے سماعت کا آغاز کیا۔
تفصیلات کے مطابق سپریم کورٹ آف پاکستان ای کورٹ رکھنے والی پہلی سپریم کورٹ بن گئی، عدالت عظمیٰ نے ویڈیو لنک کے ذریعے مقدمات کی سماعت شروع کردی۔ سماعت سے قبل چیف جسٹس سپریم کورٹ نے سب کو مبارک باد پیش کی۔
چیف جسٹس آصف سعید کھوسہ نے آئی ٹی کمیٹی کے ممبران جسٹس منصوع علی شاہ اور جسٹس مشیر عالم کو خراج تحسین پیش کیا اور چیئرمین نادرا اور ڈی جی کی کاوشوں کو بھی سراہا۔
چیف جسٹس نے کہا کہ ٹیکنالوجی کی دنیا میں یہ ایک بڑا قدم ہے، ای کورٹ سے کم خرچ سے فوری انصاف ممکن ہوسکے گا، دنیا بھر میں پاکستان کی سپریم کورٹ میں ہی ای کورٹ سسٹم کا پہلی بار آغاز ہوا ہے۔
چیف جسٹس آصف سعید کھوسہ نے کہا کہ ای کورٹ سے سائلین پر مالی بوجھ بھی نہیں پڑے گا۔
چیف جسٹس پاکستان جسٹس آصف سعید کھوسہ کی سربراہی میں تین رکنی بینچ ملکی تاریخ میں پہلی بار ویڈیو لنک کے ذریعے مقدمات کی سماعت کررہا ہے۔
ویڈیو لنک کے ذریعے شروع کیے جانے والے اس ای کورٹ سسٹم میں ابتدائی سماعت ضمانت قبل ازگرفتاری سمیت دیگر فوجداری اپیلوں کی سماعت کی جا رہی ہے۔
ای مقدمات کی سہولت ابتدائی طور پر اسلام آباد ہائی کورٹ اور سپریم کورٹ کراچی رجسٹری کے لیے دستیاب ہے۔
