اسلام آباد: سپریم کورٹ نے کہا ہے کہ اس کے ایک جج کے چیمبر سے نگرانی کے آلات کی برآمدگی کی خبر بے بنیاد ہے۔
تفصیلات کے مطابق ایک جج کے چیمبر سے نگرانی کے آلات کی برآمدگی کی خبر پر سپریم کورٹ نے اعلامیہ جاری کرتے ہوئے کہا ہے کہ سوشل میڈیا پر گردش کرنے والی خبر من گھڑت اور جھوٹی ہے۔
اعلامیے میں کہا گیا ہے کہ ایسا کوئی بھی واقعہ پیش نہیں آیا، غلط خبر کا مقصد عوام کو گمراہ کرنا اور عدلیہ کے وقار کو ٹھیس پہنچانا ہے، عدالت عظمیٰ نے سوشل میڈیا پر پھیلائی گئی خبر کو مسترد کیا ہے۔
ترجمان سپریم کورٹ کا کہنا ہے کہ اس خبر کا حقیقت سے کوئی تعلق نہیں ہے، اور خبر کی اشاعت کا مقصد عدلیہ کو متنازع بنانا ہے۔
