ایف آئی اے انسداد انسانی اسمگلنگ سرکل نے گلشن اقبال میں کارروائی کرتے ہوئے ویزا فراڈ اور جعل سازی میں ملوث 4 ملزمان کو گرفتار کرلیا۔
تفصیلات کے مطابق کراچی میں گلشن اقبال کے علاقے میں کارروائی کے دوران ایف آئی اے نے جعل سازی، ویزافراڈ اورانسانی اسمگلنگ میں ملوث 4 ملزمان کو حراست میں لے لیا۔ ملزمان میں واصف، سیدعتیق، محمد سراج اور محمد فہد شامل ہیں۔
ترجمان ایف آئی اے نے بتایا کہ کارروائی ویسٹرن انٹرپرائزز ایجوکیشن کنسلٹنٹ کے دفتر پر کی گئی۔ ملزمان سے سرکاری وغیر سرکاری اداروں کی جعلی مہریں بھی برآمد ہوئیں۔
ایف آئی اے نے بتایا کہ جعلی مہروں میں تعلیمی اداروں، وزارت خارجہ اور وزارت تعلیم کی مہریں شامل ہیں، ملکی وبین الاقوامی جامعات کی مہریں، جعلی مارک شیٹیں اور ڈگریاں بھی برآمد کی گئیں۔
ترجمان نے بتایا کہ ملزمان سے کثیر تعداد میں پاسپورٹس بھی برآمد کرلیے گئے ہیں۔ ملزمان ویزا کے حصول کے لیے جعلی سفری دستاویزات بنانے میں ملوث تھے۔
