لاہور: وزیر اعلیٰ پنجاب چوہدری پرویز الٰہی نے پنجاب کے مختلف شہروں کو موٹر وے سے منسلک کرنے کے ستلج انڈس اکنامک نیٹ ورک پروجیکٹ کی منظوری دے دی۔
تفصیلات کے مطابق وزیر اعلیٰ پنجاب چوہدری پرویز الٰہی کی زیر صدات اعلیٰ سطح کا اجلاس ہوا، اجلاس میں پنجاب کی تعمیر و ترقی کے لیے تاریخی منصوبے کا اعلان کردیا گیا۔
وزیر اعلیٰ نے پنجاب کے مختلف شہروں کو موٹر وے سے منسلک کرنے کی منظوری دے دی، منصوبے سے لاکھوں کاشت کاروں، تاجروں، صنعت کاروں اور سرمایہ کاروں کے لیے ترقی اور خوشحالی کے بئے باب کھلیں گے۔
اجلاس میں 7 اضلاع کے لیے ستلج انڈس اکنامک نیٹ ورک پروجیکٹ کی منظوری دی گئی۔
وزیر اعلیٰ کا کہنا تھا کہ 160 ارب روپے کی لاگت سے مذکورہ منصوبہ مکمل کیا جائے گا، پہلے مرحلے میں قصور بائی پاس تا لاہور رنگ روڈ جی ون سین کوریڈور مکمل ہوگا، کوریڈور پر 15 ارب روپے لاگت آئے گی۔
انہوں نے کہا کہ 7 اضلاع ایم ٹو، ایم تھری، ایم فور، ایم فائیو اور ایم الیون موٹر وے سے منسلک ہوں گے، اجناس پیدا کرنے والی منڈیوں کی موٹر وے سے رسائی بہتر ہوگی۔
وزیر اعلیٰ کا کہنا تھا کہ بہاولپور این فائیو تک چھانگڑہ شرقی انٹر چینج منسلک ہوں گے، چشتیاں تا بورے والا اور ساہیوال تا سمندری رابطہ سڑک بنے گی۔ بہاولنگر تا ساہیوال کو براستہ عارف والا ایم تھری موٹر وے سے منسلک کیا جائے گا، منچن آباد سے براستہ پاکپتن ساہیوال تک سین کوریڈور بنے گا۔
انہوں نے مزید کہا کہ وہاڑی انڈسٹریل اسٹیٹ کو ایگرو انڈسٹریل پارک میں تبدیل کیا جائے گا، پاکپتن میں ملٹی ماڈل فریٹ ٹرمنل قائم کیا جائے گا، بہاولنگر اور اوکاڑہ میں ایگرو انڈسٹریل پارکس قائم کیے جائیں گے۔
