معروف بالی ووڈ اداکارہ سوارا بھاسکر مسلمان سیاسی کارکن کے ساتھ رشتہ ازدواج میں بندھ گئیں، اپنے ولیمے کے موقع پر انہوں نے پاکستانی ڈیزائنر کے لباس کا انتخاب کیا جو براستہ دبئی ان تک پہنچایا گیا۔
سوارا بھاسکر نے گزشتہ ماہ 18 فروری کو مسلمان سیاست دان اور سماجی رہنما فہد احمد سے عدالت میں شادی کی تھی۔
اب جوڑے نے اپنی شادی کی باقاعدہ تقریبات منعقد کیں اور 2 ریسپشن دیے، ایک ریسپشن سوارا کی طرف سے دیا گیا جبکہ فہد احمد کی طرف سے ولیمے کا اہتمام کیا گیا۔
تقریبات میں معروف شوبز شخصیات سمیت سیاسی رہنماؤں نے بھی شرکت کی جن میں راہول گاندھی، اروند کیجریوال، ششی تھرور اور جیا بچن شامل تھے۔
ولیمے کے موقع پر سوارا بھاسکر نے پاکستانی ڈیزائنر علی ذیشان کا ڈیزائن کردہ لباس زیب تن کیا۔
سنہرے رنگ پر مختلف رنگوں کے موتیوں اور پھولوں سے آراستہ یہ لہنگا سوارا نے خاص طور پر پاکستان سے تیار کروایا جس کے بعد اسے لاہور سے دبئی، ممبئی، دہلی اور پھر بریلی ان کے گھر تک پہنچایا گیا۔
سوشل میڈیا پر اداکارہ نے لکھا کہ جب انہوں نے ڈیزائنر سے بات کی اور اپنی شادی کا جوڑا بنوانے کی خواہش کا اظہار کیا تو علی ذیشان بہت خوش اور پرجوش ہوئے۔
سوارا کے لہنگے کو پاکستان اور بھارت دونوں میں بہت پسند کیا جارہا ہے اور لوگ ان کے لیے نیک خواہشات کا اظہار کر رہے ہیں۔
