عید پر بچے تفریحی مقامات کا رخ کرتے ہیں اور جھولے ان کی توجہ کا مرکز ہوتے ہیں تاہم بری خبر ہے کہ اس پر پابندی عائد کر دی گئی ہے۔
اے آر وائی نیوز کے مطابق ملک بھر میں آج عیدالفطر مذہبی جوش وجذبے کے ساتھ منائی جا رہی ہے۔ نماز عید اور رشتہ داروں سے ملنے کے بعد اب لوگ بالخصوص بچے تفریحی مقامات کا رخ کر رہے ہیں جہاں جھولے ان کی توجہ کا زیادہ مرکز ہیں۔
تاہم عید کے موقع پر پنجاب میں عارضی طور پر لگائے جانے والے جھولوں پر پابندی عائد کر دی گئی ہے اور یہ فیصلہ انسانی جانوں کے تحفظ کے لیے کیا گیا ہے۔
اس حوالے سے محکمہ داخلہ پنجاب نے تمام اضلاع کے ڈپٹی کمشنرز کو مراسلے ارسال کر دیے ہیں۔
ان مراسلوں میں کہا گیا ہے کہ عید کے دوران پارکس میں بچوں سمیت لوگوں کی بڑی تعداد کی آمد متوقع ہے۔ پلے ایریاز میں مستقل بنیادوں پر لگے مکینیکل جھولوں کی مشروط اجازت ہوگی اور اس کیلیے بھی فٹنس سرٹیفکیٹ کا حصول لازمی ہوگا۔
اس سلسلے میں محکمہ داخلہ پنجاب میں مرکزی کنٹرول روم بھی قائم کیا گیا ہے، جہاں 24 گھنٹے رپورٹس مرتب کی جائیں گی۔
