شوبز انڈسٹری کے معروف اداکار سید جبران نے ڈرامہ سیریل ’عداوت‘ سے متعلق اپنی رائے ظاہر کردی۔
ڈرامہ سیریل ’عداوت‘ میں سید جبران (اسجد)، شازیل شوکت (ماریہ)، فاطمہ آفندی (اریبہ، منفی کردار)، سعد قریشی (ریحان)، دانیہ انور (بے بی، منفی کردار)، نوید رضا (انکسار)، راحت غنی (عنبر)، سچل افضل (فہد) ودیگر اداکاری کے جوہر دکھا رہے ہیں۔
عداوت کی ہدایت کاری کے فرائض سید جاری خوشنود نقوی نے انجام دیے ہیں جبکہ اس کی کہانی ریحانہ آفتاب نے لکھی ہے۔
ڈرامے کی کہانی سعد قریشی، فاطمہ آفندی، سید جبران، شازیل شوکت کے گرد گھومتی ہے جس میں دکھایا گیا ہے کہ کس طرح اریبہ، ماریہ سے بدلہ لیتی ہیں اور بے بی بھائی اسجد کی شادی کزن عنبر سے نہیں ہونے دیتیں۔
سید جبران نے کہا کہ عداوت کی کہانی خاندان پر مبنی ہے، میں یہ نہیں کہوں گا کہ اس ڈرامے میں کچھ نیا ہے جو لوگوں نے کبھی نہیں دیکھا ہوگا لیکن اس ڈرامے میں گھریلو مسائل کو مختلف انداز میں دکھایا گیا ہے۔
انہوں نے کہا کہ گھریلو مسائل بھی وہی ہوتے ہیں غلط فہمی، حسد ہوگیا لیکن ان معاملات کو حل کس طرح کیا جاتا ہے، عداوت میں بھی یہی دکھایا گیا ہے۔
سید جبران نے کہا کہ امید ہے کہ مداح ڈرامے کو پسند کررہے ہوں گے۔
