امریکا میں جاری ٹی20 ورلڈ کپ میں میزبان ٹیم نے پاکستان کو سنسنی خیز مقابلے کے بعد شکست دے کر کرکٹ کی تاریخ کا سب سے بڑا اپ سیٹ کردیا۔
پاکستان اور امریکا کے درمیان 20 اوورز کا میچ برابر ہونے کے بعد سپر اوور مرحلے میں داخل ہوا، پاکستان کی جانب سے محمد عامر نے سپر اوور کرایا، امریکا نے ایک وکٹ کے نقصان پر 18 رنز اسکور کیے اور پاکستان کو جیت کے لیے 19 رنز کا ہدف دیا۔
تاہم پاکستان کی ٹیم نے ایک وکٹ کے نقصان پر مقررہ 6 گیندوں پر صرف 13 رنز اسکور کرسکی، امریکا کی جانب سے سپر اوور سوربھ نیتراولکر نے گیند کرایا، امریکی بولر نے دوسری ہی گیند پر افتخار احمد کو پویلین بھیج دیا۔
جس کے بعد شاداب خان کریز میں اترے لیکن وہ بھی کوئی بڑا شاٹ کھیلنے میں کامیاب نہ ہو سکے، اس طرح امریکا نے 5 رنز سے میچ جیت کر ٹی20 ورلڈ کپ 2024 کا تاریخی اَپ سیٹ کر دیا۔
ٹی 20 ورلڈ کپ: امریکا نے سپر اوور میں پاکستان کو ہرا دیا
امریکا کو تاریخی فتح دلانے والے سوربھ نیتراولکر بھارتی نژاد امریکی کرکٹر ہیں، پاکستان کے خلاف سپر اوور میں سوربھ نیتراولکر نے اہم کردار ادا کیا، کھلاڑی فل ٹائم سافٹ ویئر انجینیر ہیں اور ایک کارپوریشن کمپنی میں کام کرتے ہیں۔
سوربھ نیتراولکر نے فرسٹ کلاس کرکٹ کا آغاز 2013 کی رانجی ٹرافی میں ٹیم ممبئی کی جانب سے کیا، 2014 میں انہوں نے لسٹ اے میچز بھی کھیلنا شروع کیے۔
سوربھ نیتراولکر 2010 کے انڈر 19 ورلڈ کپ میں بھی بھارت کی نمائندگی بھی کرچکے ہیں، تاہم انہیں انڈیا میں کھیلنے کے زیادہ موقع نہ ملا اور وہ بہتر مواقع کی تلاش میں امریکا آگئے۔
جنوری 2018 میں سوربھ کی امریکی کرکٹ ٹیم میں سلیکشن ہوئی اور اسی سال اکتوبر میں وہ اپنی ٹیم کے کپتان بن گئے، امریکی ٹیم نے نیتراولکر کی قیادت میں فروری 2019 میں یو اے ای کے خلاف انٹرنیشنل ٹی20 میچز کی سیریز کھیلی اور اپریل 2019 میں ڈویژن 2 انڈر19 ورلڈ کپ میں پہلی 4 ٹیموں میں جگہ بنا کر ون ڈے انٹرنیشنل ٹیم کا اسٹیٹس بھی حاصل کرلیا۔
سوربھ نیتراولکر کو عالمی سطح پر شہرت گزشتہ روز 6 جون 2024 کو حاصل ہوئی جب انہوں نے ٹی20 ورلڈ کپ کے گروپ ون میچ میں پاکستان کے خلاف سپر اوور مرحلے میں امریکا کو فتح دلانے میں اہم کردار ادا کیا۔
