بھارتی سلیکٹر نے ویرات کوہلی کو واضح پیغام دیتے ہوئے کہا ہے کہ اگر انھیں ٹی ٹوئنٹی ورلڈکپ کھیلنا ہے تو پھر یہ کام کرنا پڑیگا۔
اجیت اگرکر کی سربراہی میں قائم سلیکشن کمیٹی مبینہ طور پر اس بات کی خواہشمند ہے کہ کوہلی کو عالمی ایونٹ میں روہت شرما کے اوپننگ پارٹنر کا کردار نبھائیں۔ رپورٹس کے مطابق کوہلی کو بطور اوپنر رکھنے کے امکان پر گزشتہ ہفتے ہونے والی میٹنگ میں سنجیدگی سے غور کیا گیا۔
اس میٹنگ میں کپتان روہت، ہیڈ کوچ راہول ڈریوڈ اور چیف سیکٹر اجیت اگرکار موجود تھے۔ بھارتی ٹی ٹوئنٹی ورلڈ کپ اسکواڈ میں کوہلی کی جگہ کے بارے میں کافی قیاس آرائیاں کی جارہی ہیں۔
کوہلی کی ٹی ٹوئنٹی ٹیم میں جگہ یقینی نہیں تھی تاہم روہت، ڈریوڈ اور سلیکٹرز نے گزشتہ سال ون ڈے ورلڈ کپ کے بعد ملاقات کی تھی جس کے بعد بہت کچھ تبدیل ہوچکا ہے۔
میڈیا رپورٹس میں مزید کہا گیا ہے کہ کوہلی سلیکشن کمیٹی سے ٹی ٹوئنٹی ورلڈ کپ میں اپنی جگہ کے بارے میں وضاحت چاہتے ہیں جس پر انھیں اوپننگ کا آپشن دیا گیا ہے۔
خیال رہے کہ کوہلی آئی پی ایل کے پچھلے کچھ سیزن میں رائل چیلنجرز بنگلورو کے لیے باقاعدگی سے اوپننگ کر رہے ہیں۔
اس بار کے آئی پی ایل ایڈیشن میں فی الحال وہ 147 کے اسٹرائیک ریٹ سے سات میچوں میں 361 رنز کے ساتھ اورنج کیپ ہولڈر ہیں جبکہ وہ ایک سنچری بھی بنا چکے ہیں۔
