لاہور: آئی سی سی ویمن ٹی 20 ورلڈ کپ کیلئے پاکستان کی ویمن کرکٹ ٹیم کپتان فاطمہ ثنا کی قیادت میں ایئرپورٹ سے دبئی روانہ ہوگئی۔
تفصیلات کے مطابق آئی سی سی ویمنز ٹی ٹوئنٹی ورلڈ کپ میں شرکت کے لیے پاکستان کی ویمنز کرکٹ ٹیم آج دبئی روانہ ہوگئی ہے، آئی سی سی ویمن ٹی 20ورلڈ کپ سے قبل پاکستانی ٹیم 2 وارم اپ میچ کھیلے گی۔
پاکستان ویمن کرکٹ ٹیم پہلا وارم اپ میچ 28 ستمبر کو اسکاٹ لینڈ کے خلاف کھیلے گی، دوسرا وارم اپ میچ قومی ٹیم 30 ستمبر کو بنگلادیش کے خلاف کھیلے گی۔
ویمن کرکٹ ٹیم ٹی 20ورلڈ کپ کا اپنا افتتاحی میچ 3 اکتوبر کو سری لنکا کے خلاف کھیلے گی، دوسرے میچ میں پاکستان ویمن کرکٹ ٹیم کا 6 اکتوبر کو روایتی حریف بھارت سے مقابلہ ہوگا، ٹیم کا تیسرا میچ 11 اکتوبر کو آسٹریلیا، چوتھا میچ 14 اکتوبر کو نیوزی لینڈ سے ہوگا۔
قومی ویمن ٹیم کی دبئی روانگی سے قبل چیئرمین پاکستان کرکٹ بورڈ محسن نقوی نے ویمن کرکٹ ٹیم کے لئے نیک خواہشات کا اظہار کیا۔
چیئرمین پی سی بی نے کہا کہ ویمن ٹیم کی پلیئرز باصلاحیت اور ٹیلنٹڈ ہیں، ٹیم آئی سی سی ویمن ٹی 20ورلڈکپ میں اچھی کارکردگی دکھائے گی۔
دوسری جانب کپتان فاطمہ ثنا کا کہنا تھا کہ اچھی کرکٹ کھیلیں گے، کھلاڑیوں کا مورال بلند ہے، آئی سی سی ٹی 20ورلڈ کپ میں بھرپور صلاحیتوں کا مظاہرہ کریں گے۔
