کراچی کنگز کے جنوبی افریقی کرکٹر تبریز شمسی نے کہا ہے کہ پی ایس ایل میں کرکٹ کا معیار بہت بلند ہے،ٹیمیں کافی مضبوط ہیں۔
نجی ویب سائٹ سے گفتگو کرتے ہوئے کراچی کنگز کے کھلاڑی تبریز شمسی نے کہا کہ پاکستان میں اچھے کرکٹرز موجود ہیں، پاکستان نے ہمیشہ فاسٹ بولرز پیدا کیے،ان کی بولنگ کا معیار بھی یہاں نظر آتا ہے۔
انہوں نے کہا کہ ہم تاحال زیادہ میچز نہیں جیت سکے مگر کسی بھی ٹیم کی فتح میں کسی ایک پلیئر کا کردار نہیں ہوتا،اسی طرح شکست کا بھی کسی ایک کو الزام نہیں دیا جاسکتا۔
کراچی کنگز کے جنوبی افریقی کرکٹر نے کہا کہ کراچی کنگز اب تک نتائج اپنے حق میں نہیں کرسکے مگر ٹیم کے کئی کھلاڑی میچز جتوانے کی صلاحیت رکھتے ہیں۔
تبریز شمسی نے جوتا اٹھا کر جشن منانے کے دلچسپ وجہ بتادی
پی ایس ایل 8 کے اپنے پہلے ہی میچ کا بہترین کھلاڑی قرار پانے کے سوال پر انھوں نے کہا کہ میں کسی بھی ٹیم کی جانب سے کھیلوں کوشش یہی ہوتی ہے کہ بہترین کارکردگی دکھاتے ہوئے فتح میں اہم کردار ادا کروں۔
ان کا کہنا تھا کہ 2021 میں ٹیسٹ اور ٹی ٹوئنٹی سیریز کیلیے جنوبی افریقی ٹیم کے ساتھ پاکستان آیا تھا،کراچی میں طویل فارمیٹ کا میچ کھیلنے کا موقع نہیں ملا، اب پی ایس ایل کیلیے یہاں دوبارہ آیا تو تجربہ بڑا خوشگوار جارہا ہے۔
