سندھ میں پیپلز پارٹی کے خلاف ہم خیال جماعتوں کے اتحاد کا مشن آخری مراحل میں داخل اور اہم اجلاس آج طلب کر لیا گیا ہے۔
اے آر وائی نیوز کو ذرائع سے ملنے والی اطلاعات کے مطابق سندھ میں پیپلز پارٹی کے خلاف ہم خیال جماعتوں کے اتحاد کا مشن آخری مراحل میں داخل ہو گیا ہے۔ ن لیگ اور جی ڈی اے کی بھی سیٹ ایڈجسٹمنٹ پر مشاورت مکمل ہو گئی ہے اور دونوں جماعتوں نے سندھ کے بیشتر حلقوں میں مشترکہ امیدوار لانے پر اتفاق کر لیا ہے۔
ذرائع نے بتایا کہ جی ڈی اے سندھ سے قومی اسمبلی کی 8 اور صوبائی اسمبلی کی 10 نشستوں پر ن لیگ کی حمایت کرنے کو تیارہے۔
ذرائع نے بتایا کہ ن لیگ اور جی ڈی اے کی گزشتہ روز ایک میٹنگ ہوئی جس میں صفدر عباسی، رانا مشہود ودیگر نے شرکت کی جس میں 15 سالہ سسٹم کے خلاف مشترکہ جدوجہد اور سندھ کے عوام کو کرپشن، نا اہلی اور بد انتظامی سے نجات دلانے پر اتفاق کیا گیا۔ دونوں جماعتوں کا موقف تھا کہ 15 سال سے سندھ کے عوام کرپٹ مافیا کے نرغے میں ہیں۔ سندھ کو 15 سال سے تباہ کر کے الیکشن خریدنے والوں کو ووٹ کی طاقت سے جواب دیں گے۔
ذرائع کے مطابق ہم خیال جماعتوں جی ڈی اے، ن لیگ، ایم کیو ایم اور جے یو آئی کی اعلیٰ قیادت کا اجلاس آج طلب کر لیا گیا ہے جس میں امیدواروں کا حتمی فیصلہ اور مشترکہ انتخابی لائحہ عمل طے کیا جائے گا۔
