بالی وڈ کے سُپر اسٹار شاہ رخ خان کے گھر ’منت ہاؤس‘ میں گھسنے والے دونوں مشتبہ افراد کی تفصیلات سامنے آگئیں۔
بھارتی میڈیا کے مطابق گزشتہ ہفتے شاہ رخ خان کے گھر پٹھان ساحل اور رام صرف نامی 2 افراد گھسے جو 8 گھنٹے تک تیسری منزل پر موجود میک اپ روم میں چھپے رہے۔
بھارتی پولیس کا اس حوالے سے کہنا ہے کہ دونوں افراد نے دعویٰ کیا ہے کہ ان کا تعلق گجرات سے ہے اور وہ شاہ رخ خان سے ملنا چاہتے تھے۔
شاہ رخ خان کے گھر میں مشتبہ افراد داخل، پولیس حرکت میں
بھارتی پولیس نے کہا کہ دونوں افراد رات 3 بجے کے قریب بنگلے میں گھسے اور تقریباً 8 گھنٹے تک میک اپ روم میں شاہ رخ خان سے ملنے کا انتظار کرتے رہے جس کے بعد صبح ساڑھے 10 بجے دونوں کو پکڑ لیا گیا۔
بھارتی میڈیا کے مطابق دونوں افراد کے خلاف مختلف دفعات کے تحت مقدمہ درج کر لیا گیا ہے، دونوں افراد کی عمر 20 اور 22 سال ہے، اس حوالے سے پولیس مزید تفتیش کر رہی ہے۔