The news is by your side.

Advertisement

لائن آف کنٹرول فائرنگ، وزیراعظم آزاد کشمیر کا یو این سیکریٹری جنرل سے نوٹس لینے کا مطالبہ

مظفرآباد: آزاد کشمیر کے وزیراعظم راجہ فاروق حیدر نے کہا ہے کہ لائن آف کنٹرول پر بھارتی فوج کی فائرنگ سے 6 شہری شہید ہوئے، اقوام متحدہ کے سیکریٹری جنرل عالمی قوانین کی خلاف ورزی کا نوٹس لیں۔

وزیر اعظم آزاد کشمیر کا کہنا تھا کہ بھارتی فوج کی فائرنگ سے 8 افراد زخمی جبکہ کئی مکانات تباہ ہوئے، شہریوں پر فائرنگ عالمی قوانین کی خلاف ورزی ہے لہذا اقوام متحدہ کے سیکریٹری جنرل اس کا فوری نوٹس لیں۔

یاد رہے کہ لائن آف کنٹرول سے ملحقہ شہری آبادی پر گزشتہ شب بھارتی فوج نے بلااشتعال فائرنگ کی جس کے نتیجے میں فوجی جوان سمیت پانچ شہری شہید ہوئے، پاک فوج نے جوابی کارروائی میں بھارت کے کئی بنکرز تباہ کیے اور 9 بھارتی فوجیوں کو ٹھکانے لگایا۔

مزید پڑھیں: بھارت کو منہ توڑجواب، وزیراعظم کا پاک فوج کی جرأت کو سلام

وزیراعظم عمران خان نے لائن آف کنٹرول پر بھارتی دراندازی کی شدید الفاظ میں مذمت کی اور فائرنگ سے شہید ہونے والے جوان و شہریوں کے بلند درجات اور  زخمیوں کی جلد صحت یابی کے لیے دعا کی۔

عمران خان نے بھارت کا ڈٹ کر مقابلہ کرنے اور انہیں مؤثر انداز  سے بھرپور جواب دینے پر پاک فوج کی جرأت و بہادری کو سلام بھی پیش کیا۔

علاوہ ازیں وزیراعلیٰ پنجاب عثمان بزدار نے بھارتی فوج کی ایل اوسی پربلااشتعال فائرنگ کی شدید الفاظ میں مذمت کی اور شہدا کی عظیم قربانیوں کو خراجِ عقیدت پیش کیا۔ اُن کا کہنا تھا کہ شہری آبادی کونشانہ بنانابھارت کی بوکھلاہٹ کانتیجہ ہے، بھارتی فوج آبادی کو نشانہ بناکر انسانی حقوق کی سنگین خلاف ورزی کررہی ہے۔

Comments

comments

یہ بھی پڑھیں