کراچی : کورنگی میں خاتون ملزمہ لفٹ لینے کے بہانے موٹر سائیکل سوار شہری لوٹ کر ساتھیوں سمیت فرار ہوگئی۔
اس حوالے سے حذیفہ نامی شہری نے عوامی کالونی تھانے میں شکایت درج کروائی جس میں بتایا گیا کہ فیکٹری سے گھر آتے ہوئے کورنگی سنگر چورنگی پر کھڑی ملزمہ نے اسے روک کر لفٹ مانگی۔
درخواست گزار کے مطابق مذکورہ نقاب پوش مسلح ملزمہ کے بیک اپ پر 2 موٹرسائیکل سوار 3ملزمان موجود تھے، کورنگی نمبر5ماڈل پارک کے قریب خاتون ملزمہ نے مجھے موٹر سائیکل سے اترنے کا کہا۔
شہری حذیفہ کا کہنا ہے کہ ملزمہ موٹرسائیکل سے اتری اور اپنے ہینڈ بیگ سے اسلحہ نکال کر میرے سینے پر رکھ دیا، ملزمہ نے سرعام نقدی رقم اور موبائل فون لوٹ لیا۔
درخواست گزار نے بتایا کہ واردات کے دوران مسلح ملزمہ نے مجھے تشدد کا نشانہ بھی بنایا اور اپنے دیگر موٹرسائیکل سوار ساتھیوں کے ہمراہ فرار ہوگئی۔
متاثرہ شہری نے اندراج مقدمہ کیلئے عوامی کالونی تھانے میں درخواست جمع کر وادی ہے، پولیس نے ملزمان کی گرفتاری کیلئے کوششیں شروع کردیں۔
اندھی گولی لگنے سے خاتون زخمی
علاوہ ازیں کراچی کے علاقے نارتھ کراچی سیکٹر سیون اے ایک گھر میں نامعلوم سمت سے آنے والی گولی لگنے سے خاتون زخمی ہوگئی۔
پولیس حکام کے مطابق زخمی خاتون کی شناخت45سالہ آسیہ کے نام سے کی گئی ہے۔ زخمی آسیہ کو طبی امداد کی فراہمی کیلئے اسپتال منتقل کیا گیا ہے۔
