وزیر دفاع خواجہ آصف نے طالبان کو بھارتی ایجنٹ قرار دیتے ہوئے کہا ہے کہ بھارت طالبان کو ہتھیار سپلائی کر کے پاکستان میں حملے کیلئے تیار کر رہا ہے۔
اے آروائی نیوز کے پروگرام ’خبر‘ میں گفتگو کرتے ہوئے خواجہ آصف نے کہا کہ ہمارے پاس انٹیلی جنس ہیں کہ بھارت پاکستان میں حملے کی تیاری کر رہا ہے رپورٹس ہیں کہ بھارت آئی ای ڈیز اور دیگر ہتھیار فراہم کر رہا ہے اور وہ ٹی ٹی پی کے ذریعے اہم شہروں کو نشانہ بنائےگا۔
خواجہ آصف نے کہا کہ اشرف غنی دور میں افغانستان میں بھارت کی کئی قونصلیٹ تھیں جن کے ذریعے دہشت گردوں کو فنڈز اور اسلحہ فراہم کیا جاتا تھا مودی کی حکومت ہے اور وہ گجرات کی ذہنیت لےکر چل رہا ہے۔
انہوں نے کہا کہ بھارت نے ہمارے شہروں میں دہشت گردی کی ہے خیبرپختونخوا اور بلوچستان میں دہشت گردی کی جارہی ہے طالبان بھارتی ایجنٹ ہیں ان کا اسلام سےکوئی تعلق نہیں جب کہ بی ایل اے بھی بھارت نواز جماعت ہے وہاں سے فنڈز حاصل کرتی ہے۔
ان کا کہنا تھا کہ پلوامہ کا واقعہ بھی سب کو معلوم ہےکہ بعد میں ڈرامہ نکلا، بھارت نے پلوامہ کے بعد منہ کی کھائی اور اس بار بھی ویسا ہی ہو گا بھارت پلوامہ جیسا ڈرامہ دہرانا چاہتا ہے لیکن انہیں پھر ناکامی ہو گی ہم اس مرتبہ خاموش نہیں بیٹھیں گے اور بھرپور جواب دیں گے۔
