لاہور: وزیر اطلاعات پنجاب عظمیٰ بخاری کا کہنا ہے کہ بانی پی ٹی آئی سے طالبان اخلاقیات میں اچھے ہیں۔

اے آر وائی نیوز کے مطابق وزیر اطلاعات پنجاب عظمیٰ بخاری نے پریس کانفرنس کرتے ہوئے کہا کہ بانی پی ٹی آئی سے طالبان اچھے ہیں وہ کم سے کم جو کرتے ہیں اون تو کرتے ہیں یہ جو کرتے ہیں وہ مانتے بھی نہیں ہیں۔

انہوں نے کہا کہ بانی پی ٹی آئی کے انقلاب کا سادہ فارمولہ یہ ہے کہ گود میں اٹھا لیا جائے اور این آر او دیں۔

عظمیٰ بخاری نے کہا کہ کیا حمود الرحمان رپورٹ ایک ہفتے پہلے آئی ہے، اصل میں کمیشن تو بننا چاہیے، بانی پی ٹی آئی ملک دشمنی کیوں کررہے ہیں؟ پاکستان کے ٹکڑے کرنا ان کے ایجنڈے میں ہے۔

وزیر اطلاعات پنجاب نے کہا کہ بانی پی ٹی آئی نفرتیں پھیلا رہے ہیں ،ان کے دماغ میں 9 مئی جیسا ایک اور پلان ہے، کمیشن اس بات پر بننا چاہیے کہ یہ سب کچھ کیا ہورہا ہے۔

انہوں نے مزید کہا کہ بانی پی ٹی آئی دوسروں کے بچوں کو انتشار کیلئے استعمال کررہے ہیں، وہ جو بیانیہ بناتے ہیں اسے بچے اندھا دھند فالو کرنا شروع کردیتے ہیں ، میری والدین سے اپیل ہے کہ اپنے بچوں کو گھناؤنے مقاصد کیلئے استعمال نہ ہونے دیں۔