کابل :امریکا کے نو منتخب صدر ڈونلڈ ٹرمپ کی کامیابی پر افغان طالبان نے اپنا ردعمل دیتے ہوئے کہا ہے کہ امریکا فوری طور پر افغانستان سے اپنی افواج واپس بلائے اور اپنی پالیسی پر نظرِ ثانی کرے۔
غیر ملکی خبر رساں ادارے کے مطابق ڈونلڈ ٹرمپ کے صدر منتخب ہونے کے بعد طالبان نے اپنے ایک پیغام میں مطالبہ کیا ہے کہ امریکا افغانستان سے اپنی افواج کو واپس بلائے۔
ڈونلڈ ٹرمپ کے امریکی صدر منتخب ہونے پر افغان طالبان کے ترجمان نے ردعمل دیتے ہوئے کہا کہ امریکا کو اس موقع سے فائدہ اُٹھاتے ہوئے دنیا کے لیے اپنی پالیسوں پر نظر ثانی کرنے کی ضرورت ہے،امریکا دوسرے ممالک کی آزادی،سلامتی اور تہذیبی وقار کا خیال رکھتے ہوئے نئی پالیسی مرتب کرے تا کہ دنیا میں حقیقی امن قائم ہو سکے۔
نو منتخب امریکی صدر کے نام اپنے پیغام میں افغان طالبان کا کہنا تھا کہ افغانستان غیرت مند اور بہادر لوگوں کی سرزمین ہے جو اپنے وطن کو بہت عزیز رکھتے ہیں لہذا امریکا فوری طور پر اپنے فوجی دستوں کو افغانستان سے واپس بلوائے۔
واضح رہے کہ افغان طالبان اس سے قبل اوبامہ کی انتظامیہ سے بھی امریکی افواج کا افغانستان سے انخلاء کا مطالبہ کر چکی ہے جب کہ افغان حکومت اور افغان طالبان کے درمیان مذاکرات میں تعطل بھی امریکی افواج کے انخلا سے مشروط ہوگیا ہے۔