ملک کے دو بڑے ڈیم تربیلا اور منگلا ڈیڈ لیول کےقریب پہنچ گئے جس پر ارسا نے صوبوں کو صورتحال سے خبردار کر دیا۔
صورتحال کے پیش نظر ارسا نے پانی تقسیم کا نیا ضابطہ جاری کر دیا اور مراسلہ لکھ کر صوبوں کو آگاہ کر دیا ہے جس میں کہا گیا ہے کہ ربیع سیزن کے باقی عرصہ کیلئے پانی کی 30 سے 35 فیصد قلت کا تخمینہ ہے۔
پنجاب اور سندھ کو پانی کی قلت کا سامنا کرنا پڑے گا تاہم ڈیموں میں جتنا پانی آئے گا اتنا ہی آگے ریلیز کیا جائے گا۔ ارسا نے صوبائی محکمہ آبپاشی کو فوری اقدامات لینےکی ہدایات کر دی ہے۔
ترجمان ارسا کا کہنا ہے کہ بارشوں کی صورت میں صورتحال بہتر ہونے کا امکان ہے۔
رواں ربیع سیزن میں پنجاب نے پانی کی 20فیصد اور سندھ نے 16فیصد قلت برداشت کی۔ سندھ کی پانی کی طلب 27 ہزار اور 25ہزار کیوسک فراہم کیا جا رہا ہے۔پنجاب کی طلب 45ہزار ہے اور 40 ہزار کیوسک پانی فراہم کیا جارہا ہے۔
ترجمان کا کہنا ہے کہ بارش نہ ہونے سے منگلا اور تربیلا3،4 روز میں ڈیڈ لیول پر جا سکتے ہیں۔
