کراچی: شہر قائد میں علما کی ٹارگٹ کلنگ کا سلسلہ نہ رک سکا، سہراب گوٹھ کے قریب نامعلوم مسلح ملزمان نے فائرنگ کر کے جامعہ ابوبکر صدیق کے نائب پیش امام مولانا قیصر فاروق کی جان لے لی۔
تفصیلات کے مطابق کراچی میں ایک اور عالم دین دہشت گردی کا نشانہ بن گئے، سہراب گوٹھ کے قریب مولانا قیصر فاروق کو نامعلوم مسلح ملزمان نے نشانہ بنایا، پولیس کے مطابق جامعہ گلشن عمر کے سامنے یہ واقعہ پیش آیا۔
فائرنگ کے واقعے میں جامعہ امام محمد کا 12 سالا طالب علم عمر فاروق زخمی ہوا، واقعے کی سی سی ٹی وی فوٹیج بھی سامنے آ گئی ہے، پولیس کے مطابق مقتول مولانا قیصر فاروق اپنے رشتے کے سلسلے میں کراچی سے ڈیرہ غازی خان جا رہے تھے، ان کی جیب سے ڈیرہ غازی خان جانے کے لیے خریدا گیا ٹکٹ بھی ملا ہے۔
ساتھی علما کے مطابق مولانا قیصر 2016 میں جامعہ دارالعلوم کراچی سے فارغ التحصیل ہوئے تھے، انھوں نے درس نظامی اور تخصص بھی جامعہ دارالعلوم کراچی سے کیا تھا، جب کہ مقتول جامعہ ابوبکر صدیق پورٹ قاسم میں بطور نائب پیش امام خدمات انجام دے رہے تھے۔
واقعہ کا مقدمہ تاحال درج نہیں ہو سکا ہے، پولیس کے مطابق واقعے کی مزید تحققات کی جا رہی ہے، پولیس نے تفتیش میں مدد کے لیے سی ٹی ڈی سے رابطہ کر لیا ہے، جب کہ قتل کا مقدمہ مقتول مفتی قیصر فاروق کے اہل خانہ کی مدعیت میں درج کیا جائے گا۔
پولیس حکام کے مطابق ڈسٹرکٹ پولیس اور سی ٹی ڈی مشترکہ طور پر اس کیس کی تفتیش کریں گی، اب تک دستیاب معلومات کے مطابق 2 موٹر سائیکل سواروں نے 8 گولیاں چلائیں، 9 ایم ایم پستول کے خول فرانزک کے لیے بھیجے گئے ہیں، ملزمان نے شناخت چھپانے کے لیے ہیلمٹ کا استعمال کیا، سی ٹی ڈی اور ڈسٹرکٹ پولیس مختلف زاویو ں پر تفتیش کر رہی ہے۔
