اسلام آباد: قومی انسداد پولیو مہم کا ہدف پورا ہوگیا، پولیو پروگرام کا کہنا ہے کہ رواں سال اب تک 33 ملین سے زائد بچوں کو انسداد پولیو کے قطرے پلائے گئے۔
تفصیلات کے مطابق پولیو پروگرام پاکستان کا کہنا ہے کہ رواں سال اب تک 33 ملین سے زائد بچوں کو پولیو کے قطرے پلائے گئے، انسداد پولیو مہم 124 اضلاع میں ہوئی۔
ترجمان پولیو پروگرام کے مطابق 2 لاکھ 25 ہزار صحت تحفظ فرنٹ لائن ورکرز نے مہم میں حصہ لیا، مہم میں کرونا وائرس کی حفاظتی تدابیر پر عمل درآمد کیا گیا۔ عوام کے تعاون سے مہم کا ہدف کامیابی سے حاصل کیا گیا۔
دوسری جانب معاون خصوصی برائے صحت فیصل سلطان کا کہنا ہے کہ انسداد پولیو کے ہدف کے حصول میں صوبائی حکومتوں کا کردار قابل ستائش ہے، پولیو کے خاتمے کے لیے کامیاب مہمات کی ضرورت ہے۔
یاد رہے کہ رواں سال اب تک پاکستان میں صرف ایک پولیو کیس رپورٹ ہوا ہے جو بلوچستان میں سامنے آیا تھا۔
