لاہور : چیئرمین پی ٹی آئی عمران خان پر حملہ کرنے والے ملزم نوید کے پڑوسی کا کہنا ہے کہ نوید کو کبھی مسجد میں نہیں دیکھا، وہ عید کی نماز بھی نہیں پڑھتا۔
تفصیلات کے مطابق چیئرمین پی ٹی آئی عمران خان پر حملہ کرنے والے ملزم نوید کے پڑوسی نے میڈیا سے گفتگو میں کہا کہ نوید کو کبھی مسجد میں نہیں دیکھا، یہ عید کی نماز بھی نہیں پڑھتا۔
ملزم کے پڑوسی کا کہنا تھا کہ نوید کو طوطے کی طرح رٹا لگا کر جو یاد کرایا گیا ہے وہی بول رہا ہے، حملے کے پیچھے جو اصل لوگ ہیں ان کو سامنے لایا جائے۔
یاد رہے حقیقی آزادی مارچ کے دوران عمران خان پر فائرنگ کرنے والے مبینہ حملہ آور نے ابتدائی تحقیقات میں کہا تھا کہ ایک طرف آذان ہو رہی ہے وہاں یہ لوگ ڈیک لگا کر شور شرابہ کر رہے تھے، یہ بات میرے ضمیر نے اچھی نہیں مانی۔
مبینہ ملزم کا نوید کا مزید کہنا تھا کہ میرا ٹارگٹ صرف عمران خان تھا اور کسی کو نہیں مارنا چاہتا تھا، یہ اس لیے کیا کہ عمران خان لوگوں کو گمراہ کر رہا تھا اور مجھ سے یہ چیز دیکھی نہیں گئی، اس لیے مارنے کی کوشش کی۔
حملہ آور محمد نوید نے اپنے ویڈیو بیان میں جھوٹا دعویٰ کرتے ہوئے کہا تھا کہ عمران خان کے کنٹینر پر اذان کے وقت گانے چلتے تھے اس لیے عمران خان کو مارنے کا پروگرام بنایا۔
دوسری جانب اس حوالے سے ذرائع کا کہنا تھا کہ اذان کے وقت حقیقی آزادی مارچ کے کنٹینر سے بھی باقاعدہ اذان دی جاتی تھی اور اس کنٹینر سے نجم شیراز اذان دیتے تھے۔
