قومی اسمبلی قائمہ کمیٹی نے مطالبہ کیا ہے کہ نان فائلر کے کیش نکلوانے پر ٹیکس کی شرح 50 سے بڑھا کر 75 ہزار روپے کی جائے۔
تفصیلات کے مطابق نوید قمر کی زیر صدارت قومی اسمبلی کی قائمہ کمیٹی برائے خزانہ کا اجلاس ہوا جس میں مرزا اختیار بیگ نے کہا کہ نان فائلر کے 50 ہزار روپے کیش نکلوانے کی حد بہت کم ہے اسے بڑھایا جائے۔
اجلاس میں فاٹا/ پاٹا کو ٹیکس چھوٹ کے خاتمے کا معاملہ بھی زیر بحث آیا۔ چیئرمین ایف بی آر نے کہا کہ فاٹا پاٹا پر صرف سیلز ٹیکس 10 فیصد کی شرح سے عائد کیا جارہا ہے باقی ٹیکسوں میں فاٹا پاٹا کو پہلے سے چھوٹ موجود ہے۔
انہوں نے بتایا کہ درآمدی مشینری اور فاٹا پاٹا میں بننے والی اشیاء پر 10 فیصد سیلز ٹیکس عائد کرنے کی تجویز ہے، کمپنیوں اور افراد کو انکم ٹیکس اور ودہولڈنگ ٹیکس کی چھوٹ ہے، فاٹا پاٹا میں صنعتوں سے بجلی کے بلوں میں سیلز ٹیکس بھی نہیں لیا جاتا۔
کمیٹی رکن شہرام ترکئی نے 10 فیصد سیلز ٹیکس عائد کرنے کی مخالفت کی جس پر کمیٹی نے شہرام ترکئی سے تجاویز طلب کر لیں۔
