لاہور : پنجاب فوڈ اتھارٹی اور ٹیم سرعام نے لاہور میں غیر معیاری اور مضر صحت دودھ سپلائی کرنے والوں کے خلاف کریک ڈاؤن کرتے ہوئے ہزاروں لیٹر مضر صحت ملاوٹ شدہ دودھ تلف کر دیا، اچار کے کارخانے کو بھی دیل کردیا گیا۔
اے آّر وائی نیوز کے پروگرام سرعام کے میزبان اقرار الحسن نے پنجاب فوڈ اتھارٹی ڈائریکٹر جنرل عاصم جاوید کے ہمراہ شہر میں دودھ کی مختلف دکانوں پر چھاپے مارے اور موبائل فوڈ لیب کے ذریعے دودھ کے معیار کو چیک کیا۔ جس کے بعد کئی دکانوں کو سربمہر کردیا گیا جبکہ کچھ دکانداروں پر جرمانے بھی عائد کیے گئے۔
اس کے علاوہ ٹیم سرعام اور فوڈ اتھارٹی افسران نے اچار بنانے والی فیکٹری پر بھی چھاپہ مارا اور حفظان صحت کے قوانین کی سنگین خلاف ورزی پر دکان مالکان کیخلاف قانونی کارروائیاں کیں۔
اے آر وائی نیوز کی ٹیم اور فوڈ اتھارٹی کے عملے نے بڑے پیمانے پر کارروائی کی اور موقع پر دودھ کے معیار کو چیک کر تے ہوئے ہزاروں لیٹر مضر صحت ملاوٹ شدہ دودھ تلف کر دیا۔
ایک دودھ کی دکان پر چھاپے کے دوران مضر صحت اور جعلی دودھ برآمد ہونے پر کئی من دودھ نالی میں بہا دیا گیا، اور ساتھ ہی اس دودھ سے بنائی گئی دہی، قلفی اور اشیاء کو بھی ضائع کردیا گیا۔
غلیظ اچار بنانے والے کارخانے پر چھاپہ
اس کے علاوہ دوسری کارروائی میں اچار بنانے والے کارخانے پر چھاپہ کے دوران دیکھا گیا کہ حفظان صحت کے اصولوں کو دھجیاں اڑائی جارہی تھیں اور انتہائی غلیظ اور بدبو دار ماحول میں رکھی گئی کیریوں گاجروں اور اچار میں استعمال ہونے والی اشیاء میں پھپھوندی لگی ہوئی تھی۔
پنجاب فوڈ اتھارٹی کے افسران نے ٹیم سر عام کے سامنے فوری کارروائی کرتے ہوئے مذکورہ اچار کے کارخانے کے مالک کیخلاف مقدمہ درج کرکے اسے گرفتار کرنے کے احکامات جاری کیے اور ساتھ ہی کارخانے کو سیل کرنے کی ہدایت دی۔
