گزشتہ سے پیوستہ

کراچی : ڈاکوؤں نے فائرنگ کرکے ٹیم سرعام کے ممبر کی بھی جان لے لی، مقتول حافظ بابر خان کا قاتل درجنوں قتل کرنے کے باوجود شہر میں دندناتا پھر رہا تھا۔

ٹیم سرعام کے ایگزیکٹو ممبر حافظ بابرخان کے بھائی نے اے آر وائی نیوز کو بتایا کہ وہ سحری کے بعد نماز پڑھ کرقائد آباد میں اپنے گودام گیا تھا جہاں ایک ڈاکو نے اس سے اور وہاں موجود دیگر لوگوں سے لوٹ مار کی اور فرار ہونے کی کوشش میں فائرنگ کی اور ایک گولی بابر سے سینے میں جالگی۔

بابرخان کے دوسرے بھائی نے ٹیم سرعام کو بتایا کہ اس قاتل کو بعد میں لوگوں نے تشدد کرکے اسے موت کے گھاٹ اتار دیا تھا، انہوں نے بتایا کہ اس قاتل کیخلاف پہلے بھی 16 ایف آئی آر درج ہیں۔

ان کا کہنا تھا کہ سی سی ٹی وی کیمرے میں یہ بات بھی سامنے آئی کہ ملزم اکیلا نہیں تھا اس کا ایک اور ساتھی بھی تھا جو فرار ہونے میں کامیاب ہوگیا۔

ٹیم سرعام سے گفتگو میں مقتول بابر کے بھائی نے مزید کہا کہ پولیس کو واقعے کے تمام تر شواہد ہم نے فراہم کردیے ہیں مہینہ ہونے والا اس کے باوجود کوئی بڑی پیشرفت سامنے نہیں آرہی۔