ممبئی : بالی وڈ کی ایک اور شاہکار فلم ’اے دل ہے مشکل‘ کا ٹیزرجاری کردیا گیا ہے‘ فلم میں معروف پاکستانی اداکار فواد خان بھی جلوہ افروز ہوں گے۔
کبھی الوداع نا کہنا‘ مائی نیم از خان اور اسٹوڈنٹ آف دی ایئر جیسی منفر د فلموں سے اپنی پہچان بنانے والے کرن جوہر ایک بار پھر اپنے ناظرین کے لیے لارہے ہیں ایک انتہائی دلچسپ اور منفرد فلم‘ جس کا شائقین کو بے صبری سے انتظار ہے۔
فلم کا ٹیزر دیکھنے کے لئے نیچے اسکرول کریں
فلم کی کاسٹ میں رنبیر کپور‘ انوشکا شرما اور ایشوریا بچن مرکزی کردار ادا کررہے ہیں جبکہ پاکستانی نژاد فواد خان فلم میں مہمان اداکار کے طور پر جلوہ گر ہوں گے۔
فلم کا ٹیزر جاری کردیا گیا ہے جو کہ ارجیت سنگھ کی آواز میں فلم کے ٹائٹل سانگ پرمشتمل ہے اور فلم کے ٹائٹل سانگ نے منظرعام پر آتے ہی تہلکہ مچادیا ہے۔
ٹیزر میں دیکھا جاسکتا ہے کہ رنبیر کپور اپنے سے لگ بھگ دس سال بڑی ایشوریہ کے ساتھ رومانس کرتے نظر آرہے ہیں ‘ ویسے بالی وڈ میں یہ کوئی پہلا موقع نہیں ہے اس سے قبل بھی کئی اداکارائیں خود سے کم سن اداکاروں کے ساتھ جلوہ گر ہوچکی ہیں۔
ایک جانب تو رنبیر‘ ایشوریہ کے ساتھ عشق کی پینگیں لڑاتے نظرآرہے ہیں تو دوسری جانب فلم میں انوشکا شرما بھی موجود ہیں جن کے ساتھ رنبیر کپور پہلے ہی بمبئی ویلوٹ میں رومانوی سین کرچکے ہیں اور اس فلم میں رنبیر ایشوریہ کے ساتھ انوشکا کے ہمراہ بھی پیار میں مبتلا نظرآئیں گے اور یہی وہ ٹوئسٹ ہے جس کا شائقین بے صبری سے انتظار کررہے ہیں۔
لیکن کہانی ابھی یہاں ختم نہیں ہوتی کیونکہ فلم میں فعاد خان بھی ہیں جو کہ مختصر لیکن اہم کردار اداکررہے ہیں اور بی ٹاؤن سے موصول ہونے والی اطلاعات کے مطابق فلم میں فواد کے کردار کوشائقین کسی بھی صورت نظرانداز نہیں کرپائیں گے۔
کرن جوہر کی ہدایت کاری میں بننے والی یہ فلم 28 اکتوبر کو ہندو تہوار دیوالی کے موقع پر ریلیز ہورہی ہے اور امید کی جارہی ہے کہ ریلیز کے ساتھ ہی یہ فلم دھوم مچادے گی۔
اے دل ہے مشکل کا ٹیزر