باپ کے ساتھ دوستی کرنے پر بیٹے نے چائے کے اسٹال پر نوجوان خاتون کو قتل کر دیا، پولیس نے ماں سمیت 3 ملزمان کو گرفتار کرلیا۔
بھارتی شہر کولکتہ میں ای ایم بائی پاس پر سڑک کے کنارے واقع چائے کے اسٹال پر ایک لڑکے نے نوجوان خاتون پر جان لیوا حملہ کیا، مبینہ طور پر ملزم کو اس خاتون اور اپنے والد کے غیرازدواجی تعلقات کے بارے میں علم ہوا تھا جس کے بعد اس نے یہ قدم اٹھایا۔
پولیس نے بتایا کہ 24 سالہ خاتون کو رات 9 بجے کے قریب پرگتی میدان پولیس اسٹیشن کے قریب بائی پاس ڈھابہ پر تیز دھار آلے سے شدید زخمی کیا گیا۔
زخمی خاتون کو این آر ایس اسپتال لے جایا گیا جہاں بعد میں اس کی موت واقع ہوگئی، بھارتی ذرائع ابلاغ کے مطابق پولیس نے اس قتل کے سلسلے میں تین لوگوں کو گرفتار کیا ہے۔
تفتیش سے پولیس کو پتہ چلا کہ مذکورہ شخص کی بیوی، اس کا بیٹا اور ایک 22 سالہ شخص نوجوان خاتون کے قتل سے پہلے ہی اس مقام پر پہنچ چکے تھے، تینوں کو گرفتار کرلیا گیا ہے۔
پولیس ذرائع نے بتایا کہ اس شخص کی بیوی اور بیٹے کو افیئر کا پتہ چل گیا تھا، انھوں نے والد کی کار کو تلاش کرنے کے لیے جی پی ایس ٹریکنگ کا استعمال کیا، حملے میں مبینہ طور پر استعمال ہونے والے کو برآمد کر لیا گیا ہے۔
اس قتل نے بھارت میں سیاسی تنازعہ کو بھی جنم دیا ہے، اپوزیشن مغربی بنگال میں امن و امان کی صورتحال پر سوال اٹھا رہی ہے۔
بی جے پی کے ریاستی صدر سکانتا مجمدار نے ایکس پر حکومت پر تنقید کرتے ہوئے چیف منسٹر ممتا بنرجی کے استعفیٰ کا مطالبہ کیا ہے، انھوں نے الزام لگایا کہ ایک نوجوان خاتون کا تعاقب کیا گیا اور سرعام حملہ کیا گیا، اس کے باوجود کولکتہ پولیس کچھ کرنے میں ناکام رہی۔
