روس: کریمیا کے کالج میں طالب علم کا حملہ، 19 افراد ہلاک crimeea college shooting
The news is by your side.

Advertisement

روس: کریمیا کے کالج میں طالب علم کا حملہ، 19 افراد ہلاک

ماسکو: روس کے زیر انتظام علاقے کریمیا کے ایک کالج میں دھماکے اور فائرنگ کے نتیجے میں حملہ آور سمیت 19 افراد ہلاک اور 70 سے زائد زخمی ہوگئے۔

غیرملکی خبررساں ادارے کے مطابق روس سے الحاق شدہ سابق یوکرینی علاقے کریمیا کے پولی ٹیکنیک کالج میں ایک طالب علم نے کیفے ٹیریا میں پہلے دھماکا خیز مواد پھینکا اور پھر کالج کی عمارت میں فائرنگ شروع کردی جس کے نتیجے میں 18 افراد ہلاک ہوئے جبکہ حملہ آور نے خود کو گولی مار لی۔

حملے کے نتیجے میں 70 سے زائد افراد زخمی ہوئے جنہیں ریسکیو اہلکاروں نے طبی امداد کے لیے اسپتال منتقل کردیا۔

حملے کے بعد مقامی حکام نے جزیرہ نما کریمیا میں ایمرجنسی نافذ کرتے ہوئے 19 کلو میٹر طویل پل پر بھی سیکیورٹی تعینات کردی جو روس کو کریمیا سے ملاتا ہے جسے رواں برس ہی آمدورفت کے لیے کھولا گیا تھا۔

روسی صدر کے ترجمان کے مطابق اس حملے کی تحقیقات جاری ہیں، پیوٹن نے تفتیش کاروں کو واقعے کی تحقیقات کرنے اور ہلاک شدگان کے لواحقین سے اظہار تعزیت کی ہدایات جاری کی ہیں۔

ایک طالبہ کا کہنا ہے کہ وہ حملے سے کچھ دیر قبل ہی گراؤنڈ سے گئیں تھیں، ان کا کہنا تھا کہ متاثرین میں طلباء اور اساتذہ شامل ہیں۔

روسی میڈیا کے مطابق حملہ آور طالب علم کے دوست کا کہنا ہے کہ وہ ٹیکنیکل کالج سے سخت نفرت کرتا تھا۔

روسی تفتیش کاروں کا کہنا ہے کہ ایک 18 سالہ طالب علم واقعے کا ذمہ دار تھا جس نے بعدازاں اپنی جان بھی لے لی، طالب علم کی شناخت ولادیسلاف روسلیا کے نام سے ہوئی ہے۔

Comments

comments

یہ بھی پڑھیں