سیاٹل: واشنگٹن کے شہر سیاٹل میں ایک ہائی وے پر کچھ فاصلے سے 2 لڑکوں کی گولیاں لگی لاشیں برآمد ہوئی ہیں۔
امریکی میڈیا کے مطابق سیاٹل انٹراسٹیٹ ہائی وے کے ساتھ 2 نوجوانوں کو گولی مار کر ہلاک کیا گیا، حکام کا کہنا ہے کہ لاشیں ایک دوسرے سے آدھے میل کے فاصلے پر ملیں، تفتیش کاروں کا کہنا تھا کہ لڑکوں کی فیملیوں سے بات کرنے کے بعد یہ فیصلہ کیا گیا ہے کہ دونوں ہلاکتیں ایک دوسرے سے منسلک ہیں۔
سیاٹل ٹائمز نے رپورٹ کیا کہ جمعرات کو ہائی وے سے گزرتے ہوئے ایک ڈرائیور نے پولیس کو سڑک پر ایک شدید زخمی کے موجود ہونے کی اطلاع دی، جس پر رات ساڑھے دس بجے ریاستی پولیس پہنچی، وہاں ایک لڑکے کو گولیوں کے زخموں کے ساتھ پایا گیا۔
جمعہ کی صبح تقریباً 8 بجے ایک اور ڈرائیور نے اسی علاقے میں ایک کھائی میں ایک لاش کی اطلاع دی، پولیس پہنچی تو دیکھا کہ دوسرے نوجوان کو بھی گولی ماری گئی تھی۔
پولیس حکام کے مطابق ایک لڑکے کی شناخت جاہز فلپس کے نام سے ہوئی ہے، جب کہ دوسرے کی شناخت تاحال جاری نہیں کی گئی، تفتیش کاروں کا کہنا ہے کہ ابھی یہ نہیں کہا جا سکتا کہ لڑکوں کو گولی کہیں اور ماری گئی اور لاشیں مذکورہ مقامات پر پھینکی گئیں۔ تاہم اس سلسلے میں تفتیش جاری ہے۔
یہ بھی معلوم ہوا کہ ریاست کے محکمہ ٹرانسپورٹیشن کے کیمرے اس علاقے میں ویڈیوز ریکارڈ نہیں کرتے، اور تفتیش کاروں کو آس پاس کے علاقے میں موجود گھروں یا اسٹورز سے کوئی ایسا کیمرہ بھی نہیں ملا جس سے کسی سراغ کا پتا چل سکتا۔
