اسرائیلی دارالحکومت تل ابیب میں چاقو بردار شخص نے حملہ کرکے 4 افراد کو شدید زخمی کردیا، جبکہ شہری کی فائرنگ سے حملہ آور بھی جان سے گیا۔
بین الاقوامی خبر رساں ادارے کی رپورٹ کے مطابق تل ابیب میں نہلات بنیامین اسٹریٹ پر حملہ آور نے شہریوں پر چاقو سے حملہ کیا۔ جس کے بعد بھگدڑ مچ گئی۔
اسرائیلی میڈیا کا کہنا ہے کہ ریسکیو اہلکاروں نے زخمیوں کو اسپتال منتقل کردیا جہاں انہیں طبی امداد دی جارہی ہے، ابتدائی تفتیش کے بعد پولیس نے حملے کو دہشت گردی کی کارروائی قرار دیا ہے۔
پولیس کا اپنے بیان میں کہنا تھا کہ حملہ آور کو شہری نے فائرنگ کرکے ہلاک کردیا ہے۔ حملہ آور مراکشی نژاد امریکی شہری تھا، وہ 18 جنوری کو وزٹ ویزہ پر اسرائیل آیا تھا۔
اسرائیلی وزیر داخلہ کا اس حوالے سے کہنا تھا کہ ایئرپورٹ پر سرحدی کنٹرول کے افسران نے دہشت گرد کو ملک میں داخل ہونے کی اجازت دینے سے انکار کردیا تھا۔
اسرائیلی سیکیورٹی ایجنسی نے اس فیصلے کو مسترد کرتے ہوئے حملہ آور کو اسرائیل میں داخل ہونے کی اجازت دے دی تھی، معاملے کی تحقیقات شروع کردی گئی ہیں۔
دوسری جانب 7 اکتوبر 2023 کو فلسطینی مزاحمتی تنظیم حماس کے حملے میں سکیورٹی ناکامی پر اسرائیل کے آرمی چیف ہرزی حلوی نے عہدے سے مستعفی ہونے کا اعلان کر دیا۔
روئٹرز کی رپورٹ کے مطابق ہرزی حلوی نے وزیر دفاع کے نام لکھے گئے خط میں مؤقف اختیار کیا کہ وہ 7 اکتوبر 2023 کے حملے میں ناکامی کی ذمہ داری لیتے ہوئے 6 مارچ 2025 کو مستعفی ہو جائیں گے۔
اسرائیل کے نئے آپریشن پر حماس کا اہم اعلان
خط میں آرمی چیف نے لکھا کہ وہ حملے کے سلسلے میں دفاعی افواج کی انکوائری مکمل کریں گے اور سکیورٹی چیلنجز کیلیے تیاری کو مضبوط کریں گے۔
ہرزی حلوی کا کہنا تھا کہ میں اسرائیلی دفاعی افواج کی کمان اپنے جانشین کو منتقل کروں گا۔
