بجٹ میں موبائل فونز پر مزید ٹیکس لگنے پر ٹیلی کام سیکٹر کا ردعمل آگیا، ڈیجیٹل کمیونیکیشن کے بری طرح متاثر ہونیکا خدشہ ظاہرکردیا گیا۔
تفصیلات کے مطابق 12 جون کو وزیر خزانہ محمد اورنگزیب کی جانب سے پیش کیے گئے وفاقی بجٹ میں 500 ڈالرز تک کے موبال فونز پر 18 فیصد جی ایس ٹی لگائی گئی ہے، اس پر ٹیلی کام سیکٹر نے واضح کیا ہے کہ 18 فیصد جی ایس ٹی ڈیجیٹل کمیونیکیشن کو بری طرح متاثر کرے گا۔
ٹیلی کام سیکٹر کا کہنا تھا کہ انٹرنیٹ، ڈیجیٹلائزیشن اس ٹیکس سے متاثر ہوگی، انکم ٹیکس جنرل آرڈر میں موجود افراد پر 75 فیصد ایڈوانس ٹیکس ناقابل عمل ہے۔
وفاقی حکومت سے ٹیلی کام سیکٹر نے درخواست کی ہے کہ مذکورہ دونوں تجاویز پر فوری نظر ثانی کی جائے۔
خیال رہے کہ وفاقی بجٹ 2024 میں سیلز ٹیکس کی چھوٹ، رعایتی شرح اور استثنیٰ ختم کرنے کا فیصلہ کیا گیا ہے، موبائل فونز کی مختلف کیٹیگریز پر 18 فیصد سیلز ٹیکس لگے گا۔
متعدد اشیا پر سیلز ٹیکس کا اسٹینڈرڈ ریٹ عائد کرنے کا فیصلہ کیا گیا ہے، تانبے، کوئلہ، کاغذ، پلاسٹک کے اسکریپ پر ود ہولڈنگ ٹیکس لگانے کا فیصلہ کیا گیا ہے۔
درآمدی لگژری گاڑیوں کی درآمد پر ٹیکس چھوٹ ختم کرنے کا فیصلہ کیا گیا ہے، 50 ہزار ڈالر مالیت کی درآمد گاڑیوں پر ٹیکسز اور ڈیوٹیز بڑھانے کا فیصلہ کیا گیا ہے۔
